Komparashon di preis

Periódikamente Fundashon pa Konsumidó ta hasi komparashon di preis di produktonan ku ta optenibel na diferente establesimentu. Nos sa hasi komparashon di preis di produktonan di entre otro supermerkado, minimarket, botika i hardware. Pa hasi e komparashon di preisnan aki, Fundashon pa Konsumidó ta bishitá establesimentunan pa anotá preis di produktonan den rèki. Despues ta pone tur e preisnan den un lista, pa fasilitá konsumidónan den e proseso di hasi kompra. Tin biaha e komparashon di preis ta wòrdu hasí esaki den estrecho kolaborashon ku Ministerio di Desaroyo Ekonómiko.

Riba e paginá aki por tuma nota di e komparashon di preisnan ku Fundashon pa Konsumidó a hasi.

KOMPARASHON DI PREIS DI MAKUTU DI KARNAVAL (JAN. 2016)

KOMPARASHON DI PREIS DI MAKUTU DI KARNAVAL (JAN. 2016)

 

Komparashon di preis pakete di karnaval

Karnaval, e temporada tan gustá pa un gran parti di komunidat di Kòrsou ta den kurpa. Karnavalistanan ta preparando pa selebrá den kompania di famia i sernan kerí. Pa fasilitá nos konsumidónan ku nan kompranan den e dianan di fiesta aki, Fundashon pa Konsumidó ta suministrá un lista di komparashon di preis di produktonan di pakete di karnaval. E pakete di karnaval ta konsistí di produktonan manera, awa mineral, djus di paki, djus di bleki, stropi, limonada, awa di soda, serbes, wiski, ròm, biña, ‘chips’, karni, sosèshi, tuna den bleki, makaroni, berdura di bleki, mayonès, kèchup, mòster, papel di was, fòil, nèpkin, kùp di plèstik, kùp pa kos kayente, baki di fom, bestèk di plèstik. E lista di komparashon di preis di karnaval ta basá riba preisnan ku funshonarionan di Ministerio di Desaroyo Ekonómiko (MEO) a anotá den diferente establesimentu den e periodo di 18 te ku 20 di yanüari 2016.

E pakete di karnaval ku mas produkto ekonómiko

E supermerkado ku mas produkto na preis mas ekonómiko a resultá Bon Bini, ku 39 produkto. Produktonan ku por haña na mihó preis na Bon Bini ta entre otro, djus, limonada (Busta), wiski i chips. Na di dos lugá a sali Mangusa Hyper ku 35 produkto i na di tres lugá Mangusa Rio ku 27 produkto. Segun resultadonan di nos komparashon di preis, por haña karni na mihó preis na Centrum Mahaai. Por haña awa (Spa 1.5 liter i Luso 0.5 l i 1.5) na mihó preis na Esperamos Supermarket. E komparashon di preis di pakete di karnaval ta konsistí di 15 diferente supermerkado. Esakinan ta: 2000, Albert Heijn, Arco Iris, Best Buy, Bon Bini, Boulevard Market Place, Centrum Mahaai, Centrum Piscadera, Colon, Esperamos, Exito, Mangusa Rio, Mangusa Hypermarkt, Ruyterkade Supermarket i Vreugdenhil.

Pakete di karnaval mihó surtí

Resultadonan di nos komparashon di preis ta mustra ku Mangusa Hypermarkt a resultá e supermerkado mihó surtí ku 123 produkto, a base di e 148 produktonan kompará. Centrum Mahaai ta sigui na di dos lugá ku 110 produkto i na di tres lugá a sali Mangusa Rio. Na di kuater lugá a resultá Esperamos Supermarket ku 107 produkto.

Tepnan útil pa temporada di karnaval

Fundashon pa Konsumidó ke motivá tur konsumidó pa kòrda traha lista di kompra promé ku nan bai hasi kompra. Tuma nota di e komparashon di preis pa bo por tin un bista di e preisnan den e diferente establesimentunan. Pa haña e tabèl di komparashon di preis riba nos wèpsait, klek aki.

Pa mas informashon tokante komparashon di preis òf otro aspektonan ku ta relatá na konsumidó tuma kontakto ku Fundashon pa Konsumidó na telefòn 462-6666 òf manda un meil na info@fundashonpakonsumido.org.

Fundashon pa Konsumidó ta deseá tu nos konsumidónan un felis temporada di karnaval. Disfrutá di e temporada na un manera sano i responsabel. Kòrda protehá bo mes pa solo dor di hunta protektor di solo, bisti brel di solo, un pèchi òf sombré i bebe sufisiente awa.

KOMPARASHON DI PREIS DI MAKUTU DI PASKU (Dec. 2015)

Komparashon di preis Pakete di Pasku

Den e periodo di 30 di novèmber pa 7 di desèmber Inspektornan di departamentu di Inspekshon Ekonómiko a bishitá 16 supermerkado pa anotá preis di e produktonan di makutu di Pasku. A anotá preis di 118 produkto for di vários kategoria, entre otro ham, orea, biña, ròm, serbes, limonada, anasa den bleki i hariña. Supermerkadonan ku a partisipá na e komparashon di preis aki ta, 2000, Albert Heijn, Arco Iris, Arti’s, Best Buy, Bon Bini, Boulevard, Centrum Mahaai, Centrum Piscadera, Colon Supermarket, Esperamos, Exito, Goisco, Mangusa Rio, Mangusa Hyper i Vreugdenhil. Pa asistí konsumidónan den nan kompra di fin di aña, Fundashon pa Konsumidó a hinka tur e sifranan den un tabèl i a hasi un análisis di esakinan. Fundashon pa Konsumidó ke enfatisá ku nos no a tene kuenta ku kalidat, ni tampoko pais di orígen den e komparashon di preis, esaki por tin influensia riba e preisnan.

Bon Bini Supermarket, esun mas barata!

For di nos análisis di pakete di Pasku, Bon Bini supermarket a sali e supermerkado ku mas tantu produkto na mihó preis. Na Bon Bini por haña e siguiente produktonan na mihó preis, ham di fòrnu sin wesu, galiña hinté pa yena, pechu di galiña, Karabanso (Valrico), Biña (Canei, Mellow White Wine), Ròm San Pablo (70 cl), Ponche Kuba, Dewar’s White Label, Scotch Special (70 cl), Johnny Walker (Red Label), High Commisionair, Perrier Soda Water (0.33 ltr), Anasa di bleki (Dole, Ligo), Rasenchi (Ligo), Preimu, Buskuchi Noel, Mayonès (Hellman’s, 15 0z.), Mayonès (Kraft, Remia), Kashu (Planters) i Pringles original. E di dos i di tres supermarket ku mas produkto na mihó preis ta Mangusa Hypermarket i Mangusa Rio.

Mangusa Hypermarket e supermerkado mihó surti

Di akuerdo ku resultadonan di e análisis di pakete di Pasku ku Fundashon pa Konsumidó a hasi, Mangusa Hypermarket a resultá e supermerkado mihó surti ku 102 produkto for di e pakete di 118 produkto. E di dos supermerkado a sali Esperamos Supermarket ku 99 produkto, siguí pa Centrum Mahaai ku 96 produkto.

Redukshon leve di preis di algun komestibel tradishonal

Fundashon pa Konsumidó a kompará preisnan di e pakete di Pasku di aña 2015 kompará ku aña 2014. A base di e komparashon aki nos a konstatá un redukshon leve den preis di algun di e komestibelnan tradishonal di e pakete di Pasku. Segun resultadonan di e komparashon, preis di pékele, makrel, salmou i orea a baha notablemente. E fin di aña aki e preis mas abou di pékele ta fl. 12,08 miéntras ku na 2014 e preis mas abou tabata fl. 17,00. E preis mas abou aktual di makrel ta fl. 19,95 miéntras ku na 2014 e tabata fl. 23,95. E preis mas abou di Salmou ta fl. 35,95 miéntras ku na 2014 e tabata fl. 39,50. E aña aki Salmou di Canada ku wesu su preis mas abou ta 28,95, miéntras ku na 2014 e tabata fl. 33,96. E preis mas abou di orea e aña aki ta fl. 15,00 miéntras ku na 2014 e preis mas abou tabata fl. 19,00. Nos ke remarká ku preis di ayaka a keda kore den kasi mesun rango. Na 2014 preis di ayaka tabata varia entre fl. 6 i fl. 7,95, miéntras ku e aña aki e preis di ayaka ta kore entre fl. 6,75 i fl. 7,95. Pa loke ta trata bibida alkohóliko, nos mester remarká ku e preisnan a keda relativamente mesun kos.

Fundashon pa Konsumidó ta deseá tur nos konsumidónan felis dianan di fiesta. Disfrutá di kada momentu den kompania di sernan kerí na un forma responsabel. Hasi kompra di un forma responsabel, keda kòrda riba e presupuesto. De paso nos ke pidi konsumidónan pa tuma nota ku Fundashon pa Konsumidó lo ta sera riba 24 i 31 di desèmber 2015.

Felis dianan di fiesta

 

Download dokumento:

Klek riba e link pa download.

KOMPARASHON DI PREIS DI MATERIAL DI KONSTRUKSHON (Nov./Dec. 2015)

Kumpliendo ku su tarea pa informá i konsientisá konsumidónan, Fundashon pa Konsumidó a hasi un komparashon di preis di material di konstrukshon ku ta wòrdu bendí riba nos merkado. Pa esaki nos a bishitá 8 diferente hartwer ku ta bende material pa konstrukshon na Kòrsou. Durante di e periodo di 30 di òktober pa 5 di novèmber 2015, kolaboradónan di Fundashon pa Konsumidó a bishitá i kompará preis na e siguiente hartwernan: Kooyman, Gomez Entrerprises, Marchena Hardware, Ferreteria Skèrpènè, Dijtham, Building Depot, Wema i Staal Antillen.

Fundashon pa Konsumidó a inventarisá preis di 231 tipo di material pa konstrukshon. A kompará produktonan manera betònmat, betòneizer, kokerprofil, hukeizer, Gruf Pain, palu, porta, kozein, pipa di pvc, pvc ‘stukken’, pipa di koper, eternit, panchi di dak, plachi di zenk, plachi plafònt, multiplèks, betònplèks, pego, jòint kòmpount i fèrf. Pa medio di e komparashon di preis di material di konstrukshon aki Fundashon pa Konsumidó ke asistí konsumidónan den nan kompra di material pa konstrukshon spesialmente durante di e dianan di fiesta benidero.

Kumpra material kaminda ta kumbiní bo

Analisando e komparashon di preis di material di konstrukshon nos por konkluí ku tin hartwer ku ta skor mihó ku otro den sierto kategoria. Pa kumpra palu na un mihó preis bo por pasa na Building Depot. Si bo tin mester di kokerprofil ta kumbiní bo kumpra na Staal Antillen i Building Depot. Betònmat bo por haña na mihó preis na Ferreteria Skèrpènè i betòneizer ta sali mas barata na Gomez Enterprises. Pa multiplèks Kooyman Group ta resaltá ku su preisnan, i den e sekshon di etèrnit Gomes Enterprises ta esun ku preis mas kumbiniente. Akinan nos ke remarká sí ku artíkulonan di konstrukshon ta ser importá for di diferente merkado i pais. E echo aki por tin influensha riba kalidat i preis di e diferente artíkulonan. Ta importante pa kada un di nos tene kuenta ku esaki ora ta hasi kompra.

Lista di preis di materialnan di konstrukshon

Pa fasilidat Fundashon pa Konsumidó a pone e diferente material di konstrukshon den un tabèl, di moda ku kada konsumidó por haña un bista mas amplio di e surtido i preis ku e diferente establesimentunan ta ofresé. Pa konsulta e tabelnan klek riba e potret di material di kontrukshon.

Tepnan na ora di kompra

Komo Konsumidó sòru semper pa delantá bosa kiko bo ta buskando. Promé ku kumpra, bo mester kompará preis, kalidat, garantia i servisio. Paga tinu ora di firma pa risibí un produkto, pasobra tin ora bo ta firma tambe pa e kondishon di e produkto, o sea si e ta den bon estado òf nò. Semper kontrolá, no firma sin kontrolá! Si bo no por a kontrolá e produkto, pone esaki riba e papel i ku bo ta firma solamente pa risibí e produkto. Eksigí pa tur palabrashon ta riba papel, preferiblemente riba bo bòn. No paga pa bo artíkulo si bo no tin e  informashon ku e ta den stòk.

Download dokumento:

Klek riba e link pa download.

KOMPARASHON DI ERKO NA KORSOU (Nov. 2015)

Resientemente Fundashon pa Konsumidó a hasi un komparashon di èrko na 10 diferente establesimentu na Kòrsou. Establesimentunan ku a partisipá na e komparashon di èrko aki ta: Baba’s, Building Depot, Fujin Airconditioning Co., Kooyman, La Curacao, Omni, Polytronica, Señor Barata, Top Quality Cooling i Wimco. Un total di 19 marka di èrko a keda kompará.

Esakinan ta: Galanz, Fujin, Alaska, Gree, TCL, LG, Midea, Samsung, Panasonic, Westpoint, Frigidaire, Ecox, Premium, Mystic, Royal, Comfort Star, TGM, Trane i Westinghouse. Meta di e komparashon di èrko aki ta pa brinda konsumidónan informashon pa por hasi un eskoho konsiente na momentu di hasi kompra di un èrko.

Diferente faktor ta determiná preis di èrko

Preis di èrko ta wòrdu determiná dor di diferente faktor. Un faktor importante ta e kapasidat di e èrko (kantidat di BTU). Otro faktornan ta entre otro, marka òf vòltahe di e èrko, modèl (inverter òf nò), tipo di garantia èkstra, òf si instalashon ta inkluí den e preis. Un faktor ku awendia sigur ta importante ta gastunan ku lo bo tin na koriente. Fundashon pa Konsumidó ta konsehá un i tur pa tuma bon nota di e tabèl di komparashon di èrko pa asina por hasi un eskoho balansá i efisiente.

Buska informashon di e èrko

Hasi un investigashon promé ku bo disidí pa kumpra bo èrko. Tin algun punto ku sigur bo mester tene kuenta kuné. Semper buska informashon di e marka di èrko. Informashon tokante e kantidat di aña ku e marka ta eksistí por duna bo un bon indikashon si, den futuro, lo bo haña piesa p’e èrko si e daña.     Inventarisá tambe komentarionan ku usuarionan di e marka di èrko ta pone riba internèt. Esakinan ta balioso pa bo sa mas di kalidat i durabilidat di e marka di èrko. Informá tambe pa kondishonnan di servisio i di garantia di e marka di èrko i di e bendedó promé bo kumpra. Pa si dado kaso e èrko daña i mester di drecha bo no bin tende ku no ta bende e marka mas òf no tin piesa mas p’e. Awendia tin, banda di negoshinan spesialisá den benta di èrko, hopi otro establesimentunan ku ta bende èrko. Tene na kuenta den bo eskoho e balanse entre konseho i servisio spesialisá i un preis kisas mas barata.

Kapasidat di èrko

E kapasidat di un èrko ku bo mester ta dependé di e grandura di espasio. Kapasidatnan ku tin di èrko ta 9, 12, 18 i 24 i 30 BTU (Britisch Thermal Unit). Mas haltu e kapasidat, mas karu e èrko ta. Ta sumamente importante pa bo kumpra un èrko di e kapasidat apropiá pa e sitio ku mester fria. Un èrko muchu grandi òf chikí por pone ku e èrko su durabilidat ta bira ménos ku normal, debí ku por ehèmpel e èrko mester traha muchu duru pa mantené e temperatura deseá den e espasio. Konseho di Fundashon pa Konsumidó ta pa semper laga un tékniko sertifiká, di e establesimentu kaminda ta bai kumpra e èrko, hasi un inspekshon i midi e espasio kaminda mester instalá e èrko i indiká e kapasidat di èrko nesesario. Pa kontrolá esaki bo por hasi uzo di un kalkuladó di BTU riba di Internèt. Bo ta hinka e midínan di e kamber (haltura, hanchura i grandura) i e sistema ta kalkulá kapasidat di e èrko ku bo mester.

Fundashon pa Konsumidó tei pa’bo..

Pa mas informashon tokante di komparashon di èrko i tepnan pa kompra di èrko tuma kontakto ku Fundashon pa Konsumidó na telefòn 462-6666, via i-meil na info@fundashonpakonsumido.org, bishitá nos página di Facebook, nos wèpsait www.fundashonpakonsumido.org òf pasa serka nos na ofisina na de Ruyterkade 53.

E komparashon di erko aki a wordu tene di 28 – 30 oktober 2015..!

Download dokumento:

Klek riba e link pa download.

KOMPARASHON DI PREIS DI FRUTA I BERDURA (AUG./SEPT. 2015)

Siguiendo ku nos análisis di preisnan den supermerkadonan i minimarketnan, Fundashon pa Konsumidó, ta pone atenshon na preisnan di fruta i bèrdura. E makutu di fruta i bèrdura ku nos a usa pa e komparashon di preis aki, ta konsistí di 51 produkto diferente. E produktonan ta: batata, batata dushi, yuka, maishi, lamunchi, pampuna, banana, konofló, siboyo, tomati, promèntòn, spinazi, awakati, broccoli, prei, wòrtel, anasa, kiwi, bakoba, mandarein, pera, plùm, apel, apelsina, milon, mango, papaya, patia i drùif.

Vreugdenhil, mihó pa loke ta trata preis di fruta i bèrdura      

Resultadonan di nos komparashon di preis ta mustra ku Vreugdenhil Supermarket tabatin mas tantu fruta i bèrdura na mihó preis kompará ku otro supermerkadonan. Nan tabatin banana, tomati venezolano, promèntòn bèrdè, pera, apel kòrá (Delicious) i apelsina merikano (pa pida/ 8 pida) na mihó preis. Best Buy a resultá e di dos supermerkado ku mas fruta na mihó preis. Akinan e konsumidó por haña bakoba,  apel golden (delicious), apelsina merikano (4 pida), milon hinté, mango i drùif black seedless na mihó preis. Mangusa Hypermarket i Arti’s a sali na di tres lugá den e supermerkadonan ku mas fruta i bèrdura na mihó preis.

Mangusa Hypermarket mihó surti pa loke ta trata fruta i bèrdura

For di e komparashon di preis di fruta i bèrdura, Mangusa Hypermarket a sali e supermerkado mihó surtí. Mangusa Hypermarket tabatin 32 produkto for di e makutu di fruta i bèrdura di 51 produkto ku nos a preselektá. Mangusa Rio i Bon Bini supermarket a resultá na di dos lugá den e supermerkadonan mihó surtí ku 31 produkto. Na di tres lugá a resultá, Arco Iris Supermarket, Esperamos Supermarket i Centrum Mahaai, tur tres ku 30 produkto for di e makutu preselektá.

Diferensia notabel den preisnan di algun fruta i bèrdura na Albert Heijn

Fundashon pa Konsumidó a tuma nota di algun diferensia notabel den preis di algun fruta i bèrdura na Albert Heijn. Por ehèmpel plùm ta kosta fl. 5,58 pa kilo na Centrum Piscadera, miéntras ku na Albert Heijn e ta kosta fl. 20,44 pa kilo. Kiwi ta kosta fl. 3,80 na Arti’s i na Albert Heijn e ta kosta fl. 13,66 pa kilo. Di otro banda, Broccoli na Albert Heijn ta kosta fl. 7,99, miéntras ku na Bonam Minimarket e ta kosta fl 15,50 pa kilo. Ta konosí ku Albert Heijn ta importá hopi produkto for di Europa, loke por ta motibu ku su preisnan ta mas haltu ku na otro supermerkadonan ku ta importá produktonan for di Merka, Venezuela, Panama, China, etc. Pues Fundashon pa Konsumidó ta pidi tur persona pa ora ta kompará preis di produktonan tene kuenta ku preis di produktonan por ta varia dependé e pais di importashon, marka i kalidat di produkto.

Kome fruta i bèrdura tur dia

Fundashon pa Konsumidó ta konsiderá fruta i bèrdura masha importante, pasobra esakinan ta duna e kurpa humano vitalidat i ta kontribuí na un bon funshonamentu di mente. P’esei nos ke motivá tur hende pa kome fruta i bèrdura diariamente pa yuda mantené nan mes salú. Sí nos ke pidi tur hende pa informá nan mes bon promé kua i kuantu fruta i bèrdura ta kuadra ku nan kurpa i estilo di bida pa evitá ku esaki por kousa kualke malestar. Tambe Fundashon pa Konsumidó ke rekordá konsumidónan pa pone bon tinu na momentu di kumpra fruta i bèrdura. Komo ku nos ta biba den un klima kalor, fruta i bèrdura por daña masha lihé. Pues wak bon, fula bon i hole esakinan bon promé ku kumpra, pa evitá disgustu òf dispidimentu di sèn. Pa kualke pregunta, informashon òf sugerensia bo por bishitá nos wèpsait www.fundashonpakonsumido.org, meil nos na info@fundashonpakonsumido.org, bèl nos na 462-6666 òf pasa serka nos na ofisina na de Ruyterkade 53.

KOMPARASHON DI PREIS DI PRODUKTONAN DI PROME NESESIDAT (AUG./SEPT. 2015)

KOMPARASHON DI PREIS DI PRODUKTONAN DI PROME NESESIDAT (AUG./SEPT. 2015)

Komparashon di preis den supermerkado i minimarketnan

Un bista riba preis di produktonan di promé nesesidat

Siguiendo ku e análisis di preisnan den supermerkadonan i minimarketnan ku a tuma lugá di 24 di ougùstùs pa 8 di sèptèmber 2015, Fundashon pa Konsumidó, e biaha aki ta pone atenshon na produktonan di promé nesesidat. E makutu di produktonan di promé nesesidat ku nos a hasi uso di dje pa e komparashon di preis aki, ta konsistí di 125 produkto. E produktonan ta partí den e siguiente kategorianan: kos pa hunta den pan, bonchi di bleki, bonchi den paki, maishi di bleki/glas, sòpi di bleki/paki, spaguèti i makaroni, aros, ariña di funchi, ariña di pan, zeta, manteka, tomati pasta, suku, te, kòfi, cornflakes, djus di fruta, lechi di paki, lechi di bleki, lechi di puiru, stropi, limonada, pasta di djente, habon di baña, toaya sanitario, habon di laba tayó, desinfektante, kloròks i papel di w.c.

Esnan mihó surti

For di e investigashon di preis di produktonan di promé nesesidat, Centrum Mahaai a resultá e supermerkado mihó surtí. Centrum Mahaai tabatin 100 produkto for di e makutu di 126 produkto ku nos a preselektá.

Esperamos Supermarket ta e di dos supermerkado mihó surtí. Einan tabatin 99 produkto for di nos makutu.

E di tres supermerkado mihó surtí a resultá Arco Iris, ku 98 produkto.

E supermerkadonan ku mas produkto na mihó preis

A base di e komparashon di preis, Bon Bini supermarket a resultá e supermerkado ku tin mas tantu produkto na mihó preis for di e makutu di produktonan promé nesesidat. Bon Bini Supermarket tabatin e produktonan, Valrico bonchi kòrá, Grace bonchi kòrá, Camilia green split peas, Libby’s, Funchi Fresku/hel, Gold Medal (all purpose), Vigo (extra virgin), Badia (extra virgin), Royal, Crown, Colcafe Clasico, Quaker Quick cooking, Bonle, Sun Quick orange, Jab i Vex, All Clean, Glorall, Softex i Noky na mihó preis.

E di dos supermerkado ku mas produkto na mihó preis a sali Centrum Mahaai, mientras ku Mangusa Hypermarket a resultá na di tres lugá.

Pa un mihó bista di e preisnan nos ta referí bo na e lista di preis di produktonan básiko ku tambe nos a publiká den medionan di komunikashon i riba nos wèpsait www.fundashonpakonsumido.org.

Skohe konsiente: kumpra loke bo tin mester promé

Kumpra produktonan di promé nesesidat ta un mester, no ta un opshon, pero kiko bo ta kumpra, kuantu bo ta kumpra, ki kalidat di produkto bo ta kumpra i produkto di ki preis bo ta kumpra, sí ta kosnan ku bo ta liber pa bo skohe. Fundashon pa Konsumidó ke motivá tur hende pa kumpra loke ta nesesario promé, i si sobra sèn ku no ta destiná pa otro gastunan, por kumpra algu èkstra. Tambe nos ke enkurashá konsumidónan pa ora ku ta bai kumpra kos, pa pone bon tinu na kalidat di produkto, ingredientenan di e produkto i fecha di vensementu di produkto promé ku kumpra. Fundashon pa Konsumidó ta fasilitá bo listanan di komparashon di preis, pa yuda bo evaluá preisnan bon, pa asina bo por hasi kompra di un forma ku ta kumbiní bo saku. Si bo ke tin pregunta òf bo ke mas informashon i tep balioso pa bo komo konsumidó, bo por bishitá nos wèpsait www.fundashonpakonsumido.org, meil nos na info@fundashonpakonsumido.org, bèl nos na 462-6666 òf pasa serka nos na ofisina na de Ruyterkade 53.

KOMPARASHON DI PREIS DI KARNI DEN SUPERMARKET I MINIMARKET (AUG/SEPT. 2015)

Den kuadro di su tarea pa informá konsumidónan, Fundashon pa Konsumidó den koperashon ku Ministerio di Desaroyo Ekonómiko a hasi komparashon di preis di karni den supermerkado i minimarketnan, den e periodo 28 di ougùstùs pa 8 di sèptèmber 2015. E komparashon di preis aki a tuma lugá den 20 establesimentu, esakinan ta: 2000, Arco Iris, Arti’s, Best Buy, Bon Bini, Boulevard Market Place, Centrum Mahaai, Centrum Piscadera, Colon, Esperamos, Exito, Mangusa Rio, Mangusa Hypermarket, Vreugdenhill, LZF, Fei Cui, Bonam, Queens, Luna Park i Sta. Maria. E lista preselektá pa e komparashon di preis ta konsistí di 35 diferente produkto, entre otro bifstùk, sucadelappen, pòrchòp, karni stobá, lomitu, karni kabritu, mondongo, loin ribs i galiña. Tambe a kompará preis di sierto belèg, manera keshi, ham, wòrst salu i wòrst dushi.

E supermerkadonan mihó surtí

A base di e komparashon di preis Esperamos Supermarket a resultá e supermerkado mihó surtí.

Esperamos tabatin tur e 35 produktonan ku tabatin riba e lista ku Fundashon pa Konsumidó a pre-selektá.

Mangusa Rio i Mangusa Hypermarket a sali na di dos lugá, ku 34 produkto.

Na di tres lugá a sali Bon Bini Supermarket i Vreugdenhil, ambos ku un kantidat di 33 produkto.

E supermerkadonan ku mas produkto na mihó preis

Mangusa Rio i Mangusa Hypermarket a resultá tambe di tin mas tantu produkto na mihó preis kompará ku e otronan. Interesante pa menshoná ku tur dos filial di Mangusa tabatin e mesun produktonan na e mesun preis. E dos supermerkadonan aki tabatin e siguiente produktonan na mihó preis: higra di baka, mondongo, pòrchòp sin wesu, galiña mulá, pechu di galiña, drumsticks, thighs sin wesu, ala di galiña i wòrst dushi.

Centrum Mahaai a sali na di dos lugá pa loke ta trata kantidat di produkto na mihó preis, einan e produktonan flanksteak, sucadelappen, nier di baka, karni kabritu, jonge kaas, schouderham i wòrst salu tabata na mihó preis.

Diferensia di preis

Pa loke ta trata preis, Fundashon pa Konsumidó a konstatá ku tin diferensianan grandi entre e preis mas abou i e preis mas haltu di diferente produkto. Por ehèmpel, pa loke ta trata karni, preis di kogelbifstùk ta varia entre fl. 15,95 pa fl. 27,51 pa kilo i pòrchòp sin wesu ta diferensiá di fl. 11,50 pa fl. 25,00 pa kilo. Den e diferente belègnan, jonge kaas ta varia di fl. 13,46 pa fl. 25,00 i preis di schouderham ta varia entre fl. 9,42 pa fl. 25,00 pa kilo.

Fundashon pa Konsumidó ta rekomendá konsumidónan pa hasi uso di e komparashon di preis ku nos ta suministrá. Esaki por yuda bo sigur pa por hasi kompra mas konsiente, kual lo kumbiní bo saku i benefisiá bo salú. Fundashon pa Konsumidó ke pone bon kla ku den e komparashon di preis aki nos no a tene kuenta ku lugá di orígen ni kalidat di e diferente produktonan. Pues e responsabilidat final ta keda na kada konsumidó pa kompará preis, kontrolá produktonan bon i buska bon informashon serka komersiantenan promé ku kumpra.

Kumpra karni i belèg pa siman

Nos ke motivá tur nos konsumidónan pa evaluá bon kua ta e mihó forma pa kumpra karni i belèg. Nos ta rekomendá pa kumpra karni i belèg kada siman, embes di kada luna, esaki ta pa evitá desperdisio i komementu di karni ku ta para muchu dia den vrizer na kas. Pa mas tep balioso tokante di kompra i komparashon di preis di produktonan di supermerkado i minimarket por bishitá nos wèpsait www.fundashonpakonsumido.org, bèl nos na 462-6666 òf pasa serka nos na ofisina na de Ruyterkade 53.

KOMPARASHON DI PREIS DI BOTIKA (AUG. 2015)

Resientemente Fundashon pa Konsumidó a hasi komparashon di preis di produktonan di botika. E komparashon a tuma lugá durante di e periodo di 31 di yüli pa 8 di ougùstùs 2015. A bishitá un total di 28 botika pa hasi e komparashon di preis aki. E komparashon di preis ta basá riba un makutu preselektá di 77 produkto, ku ta repartí den diferente kategoria, esakinan ta: awa pa higiena pa boka, pasta di djente, habon pa baña, gèl pa baña kuné, puiru, deodorante, toaya femenino, pomada, krema pa kurpa, shampo/’conditioner’, ‘relaxer’ pa kabei i pintura. A kontrolá tambe palitu pa limpia orea, katuna, ‘remover’ pa uña, ‘zalf’ pa kurpa, tambe habon pa man, krema pa feita i tambe ‘splash lotion’.

E tres botikanan ku mas produkto na preis ekonómiko

Resultado di e komparashon di preis ta indiká ku Botica Groot Piscadera ta esun ku tabatin mas produkto na un preis mas ekonómiko na momentu ku nos a bishitá e establesimentu pa anotá preis di e produktonan. Nan tabatin 31 produkto for di e makutu di 77 produkto ku nos a preselektá. E di dos botika ku mas produkto barata a resultá Botica Cerrito, ku 24 produkto. Na di tres lugá a resultá Botica Novo ku un kantidat di 20 produkto for di nos makutu di 77 produkto.

Botikanan mihó surti

E botikanan mihó surtí a base di e komparashon di preis aki a resultá Botica Groot Piscadera i Botica Cerrito. For di e lista preselektá di 77 produkto, ámbos botika tabatin 62 di e produktonan den rèki. Botica Novo tabatin 54 produkto for di 77, siguí pa Botica Zuikertuintje i Botica Gosie ku 49 produkto for di nos makutu di 77 produkto. Por tuma nota ku den e kompilashon di preis di produktonan di botika, Botica Antilliana no ta aparesé, ya ku nan tabata disponé di hopi tiki produkto for di e lista ku nos a preselektá.

Diferensia di preis

Tin un diferensia notabel entre e preis di mas ekonómiko i esun di mas karu pa loke ta trata algun produkto. Por ehèmpel un bòter di Listerine Original di 250 ml ta kosta fl. 6,95 na Botica Popular, pero na Botika Mampuritu i Botika Santa Maria e ta kosta fl. 11,71. E tubu di pasta Colgate Total di menta di 6oz ta kosta fl. 9.01 na Botica Piscadera, mientras ku na Botica Novo e ta kosta fl. 16.59. Na Botica Cerrito, Gosie, i Groot Piscadera un produkto di pinta kabei marka Bigen di 40 gram ta kosta fl. 23.21, mientras ku na Botica Mampuritu e mesun produkto ei ta kosta fl. 28.67.

Fundashon pa Konsumidó ta fasilitá konsumidónan e komparashon di preis aki pa duna nan un mihó bista di e produktonan riba merkado. Nos ke enkurashá nos konsumidónan pa evaluá preisnan bon di forma ku nan por hasi kompra konsiente i responsabel. Pa mas informashon tokante di komparashon di preis di produktonan di botika i otro informashon relashoná ku derechinan di konsumidó por email nos na info@fundashonpakonsumido.org òf bèl nos na 462-6666.

Download dokumento:

Klek riba e link pa download.

KOMPARASHON DI PREIS DI BACK TO SCHOOL (JULI 2015)

Fundashon pa Konsumidó den estrecho koperashon ku Ministerio di Desaroyo Ekonómiko ta fasilitá mayornan i muchanan un lista amplio di komparashon di preis di artíkulonan pa skol 2015. Ku e akshon aki e dos institutonan ke fomentá kompra konsiente i responsabel di konsumidónan.

Den e periodo di 13 pa 22 di yüli último Ministerio di Desaroyo Ekonómiko a bishitá 16  diferente establesimentu pa anotá preis di diferente artíkulo pa skol.

E establesimentunan ku a forma parti na e komparashon di preis aki ta: Samsom Chobolobo, Samsom Digital Plus, Samsom Colon, Samsom Jan Noorduynweg, Office Stòp, La Curacao, Curacao Office Supply, Mensing Caminada, Multi Centrum 2000, Señor Barata Sta Maria, Super Barata, Bruna, Office System, Casa Cesar, Building Depot i Home Plus.

E lista di preis di artíkulonan pa skol ta basá riba un kantidat di 61 artíkulo. For di nos análisis Samsom Digital Plus a resultá e establesimentu mihó surtí, ku 58 artíkulo for di e 61 nan ku a hasi anotashon di dje. Despues ta sigui Samsom Colon i Mensing Caminada, ambos ku un kantidat di 56 artíkulo di kua a anotá preis di den rèki.

Makutu básiko di artíkulo pa skol

Fundashon pa Konsumidó ta remarká ku den e anotashon di preis, no a konsiderá kalidat ni orígen di e artíkulonan. P’esei Fundashon pa Konsumidó ta rekomendá kada mayor, komo konsumidó konsiente, pa analisá e lista di preis bon pa por krea un lista balansá segun nan propio kriterionan. Artíkulonan manera agènda, skref pa matemátika (5 mm) i skref di liña horizontal, dikshonario,  pèn, pòtlot, steft, pòtlot di koló, linial (30cm), paser, linial drihuk, skèr, gùm, leim, kalkuladó sientifiko, sleiper simpel, map di plèstik fini, hus di plèstik, beibel na papiamentu, tas di skol, trònchi di pan i tèrmu ta forma un makutu básiko pa skol.

Tas di skol

Nos a tuma nota ku tin un diferensia remarkabel entre preisnan di tas di skol. Pa loke ta trata tas di skouder, e tas di mas barata ta NAf 9,95 na Multi Centrum 2000, NAf. 17,98 na Señor Barata Sta Maria i  NAf. 19,75 na Casa Cesar. E tasnan di lomba mas barata su preis ta NAf. 8,30 na Home Plus, NAf. 8,50 na Building Depot i NAf. 14,- na Multi Centrum 2000.

Agènda di mas barata

Preis di agènda ta varia bastante entre e diferente establesimentunan. Segun e lista di komparashon e agèndanan ku plachi di mas barata ta kosta NAf. 12.95 na Super Barata, siguí pa NAf. 19,20 na Samsom Colon. E agèndanan sin plachi di mas barata ku nos a señalá riba e lista ta kosta NAf. 7,20 na Bruna, NAf. 8,95 na Casa Cesar i NAf. 10,50 na tur e 4 filialnan di Samsom.

Dikshonario

Dikshonario ta un di e artíkulonan ku hopi biaha nos muchanan mester disponé di dje prinsipalmente na momentu ku nan ta bai kuminsá nan estudio na skolnan avansá. Por mira riba e lista ku e preis di mas barata pa dikshonario Spañó – Hulandes (Prisma) ta NAf. 26,50 na Mensing Caminada, mientras ku e dikshonario Ingles – Hulandes (Prisma) mas barata ta NAf. 31,99 na Señor Barata Sta Maria.

Fundashon pa Konsumidó a kompilá preis di e diferente artíkulonan pa kada konsumidó por tin un bista mas amplio di e diferente preisnan na e diferente establesimentunan. Nos ke enkurashá mayornan pa hasi kompra na un forma responsabel. Paga tinu riba e preis, pero tambe tene kuenta ku kalidat di e artíkulo, pasobra esaki ta determiná pa gran parti su durabilidat. Tambe nos ke kòrda mayornan pa kumpra kaft pa buki di manera ku por konservá e bukinan durante di aña eskolar.

Fundashon pa Konsumidó ta deseá alumnonan i mayornan tur klase di éksito pa e temporada di skol nobo ku ta kuminsá na ougùstùs 2015 próksimo. Pa mas informashon tokante di preis di artíkulonan òf otro temanan relashoná ku derechi di konsumidó por pasa serka nos na De Ruyterkade 53 òf tuma kontakto via i-meil info@fundashonpakonsumido.org, telefòn 462-6666 òf nos wèpsait: www.fundashonpakonsumido.org.

Pa wak e tabelnan di nos makutu di Back to School, klek aki..!

KOMPARASHON DI PREIS MEI 2015

Den luna di mei Fundashon pa Konsumidó a hasi un komparashon di preis di un lista di produkto igual na esun di nos komparashon di preis di mart 2015. E motibu pa a selekshoná e mesun produktonan ta pa asina nos por tin un mihó bista di desaroyo di preisnan den transkurso di e último 2 lunanan. Pues e biaha aki nos a kompará preisnan di mart ku esnan di mei 2015.

E aktividat di anotashon di preis a tuma lugá den e periodo di 20 pa 27 di mei 2015. Na e okashon aki Fundashon pa Konsumidó a bishitá 20 diferente establesimentu. Preis di un kantidat di 148 produkto a keda anotá i kompará. E supermerkado- i minimarketnan ku a keda bishitá ta: 2000, Arco Iris, Arti’s Otrabanda, Best Buy, Bon Bini, Boulevard Market Place, Centrum Mahaai, Centrum Piscadera, Colon Supermarket, Esperamos, Exito, Mangusa Rio i Mangusa Hypermarkt, Vreugdenhil, Beurs, Fei Cui Minimarket, Bonam Minimarket, Queens Minimarket, Luna Park Minimarket, i Sta Maria Minimarket.

E produktonan ta repartí den, entre otro, e siguiente kategorianan: tuna den bleki, salmou den bleki, saldinchi den bleki, uster, piská, bèrdura, maishi den bleki òf bòter, pitipuá, roibit na blòki  òf na slais, pitipuá i wòrtel, bonchi den bleki òf paki, sòpi den bleki, i funchi.

Pa loke ta trata e kategoria di piská por a nota ku algun supermerkado a baha nan preis den luna di mei kompará ku e último komparashon di luna mart 2015. Por ehèmpel, na Boulevard Market Place, un kilo di dradu tabata kosta fl. 15,69 na mart i awor e ta kosta fl. 14.95. Na Vreugdenhil dradu tabata kosta fl. 24,00 i awor e preis a bira fl. 19,95, un bahada di preis di  fl. 4,05. Un konsumidó tabata paga na Arco Iris fl. 25,50 pa un kilo di filè di bòkel awor ta fl. 17,00 pa kilo, un diferensia di fl. 8,50 pa kilo. Na Bon Bini un konsumidó tabata paga fl. 24,33 pa un kilo di Piska kòrá awor bo ta paga fl. 19,03 pa kilo, un bahada di fl. 5,30.

For di nos análisis nos por dedusí ku un promedio di 65% di e produktonan kompará a mantené e mesun preis. Mangusa Hypermarket a resaltá akinan ku un total di 81% di produkto di kua e preis no a kambia kompará ku mart. Si nos midi e porsentahe di produktonan ku a subi òf baha di preis nos ta mira ku Arti’s tin un porsentahe haltu den ámbos kategoria. Arti’s a mantené 15.4% di su produktonan kompará na e mesun preis, miéntras ku 33.3% a baha di preis i 51.3% a subi. Di tur e supermerkado- i minimarketnan un promedio di 15% di produkto a baha di preis kompará ku mart, i 19.5% a subi di preis.

(Pa e tabel kompletu, klek riba e tabel)

Fundashon pa Konsumidó a pone e análisis di e dos komparashonnan den un tabèl pa kada konsumidó por haña un bista amplio di e desaroyonan di preis den e último dos lunanan. Bo por konsultá tambe e komparashonnan di preis di mart i mei separadamente.

Pa komparashon di preis di Mart, klek aki.

Pa komparashon di preis di Mei, klek aki.

Pa mas informashon por tuma kontakto nos ofisina na telefon 462-6666 òf via nos mail info@fundashonpakonsumido.org.

Mei 2015

KOMPARASHON DI PREIS DI MAKUTU DI KUARESMA (MRT/APR' 15)

Investigashon di preis makutu kuaresma

Manera ya ta un tradishon den e temporada di kuaresma, Fundashon pa Konsumidó, den estrecho koperashon ku Inspekshon Ekonómiko di  Ministerio di Desaroyo Ekonómiko, a hasi anotashon di preis di produktonan ku konsumidónan ta kumpra mas durante e temporada aki. Mayoria di e produktonan ku a keda kompará ta komestibelnan òf produktonan di laman ku no ta kai bou di preis máksimo stipulá dor di Gobièrnu. Fundashon pa Konsumidó na su turno a analisá e resultado di e investigashon i ta publiká e resultado den un komparashon di preis, sakando e preisnan mas notabel afó.

Durante e investigashon aki solamente a hasi un komparashon di preis i no a tene kuenta ku e kalidat di e produkto. Teniendo esaki na kuenta Fundashon pa Konsumidó ta hasi un apelashon na tur konsumidó pa no aseptá produktonan inferior, pa paga bon tinu riba reglanan di higiena i wak bon loke bo ta kome. Mester ta asina, ku tur produkto ta bini ku un etikèt ku ta bisa kiko ta entre otro ingredientenan di e produkto i kon a prosesá esakinan.

E aktividat di anotashon di preis a tuma lugá den e periodo di 24 pa 26 di mart 2015. Na e okashon aki Inspekshon Ekonómiko di Ministerio di Desaroyo Ekonómiko a bishitá 21 diferente establesimentu. A kontrolá preis di un kantidat di 157 produkto. E supermerkado- i minimarketnan ku a keda bishitá ta: 2000, Arco Iris, Arti’s Otrabanda, Best Buy, Bon Bini, Boulevard Market Place, Centrum Mahaai, Centrum Piscadera, Colon Supermarket, Esperamos, Exito, Mangusa Rio i Mangusa Hypermarkt, San Pedro, Vreugdenhil, Beurs, Fei Cui, Bonam, Queens, Luna Park, i Sta Maria. Inspekshon Ekonómiko a opta e biaha aki pa no anotá preis na e establesimentunan Goisco i Cost-U-Less Albert Heijn i Alves pa diferente motibu.

E produktonan ta repartí den diferente kategoria, entre otro: tuna den bleki, salmou den bleki, saldinchi den bleki, uster, piská, bèrdura, maishi den bleki òf bòter, pitipuá, roi bit na blòki  òf na slais, pitipuá i wòrtel, bonchi den bleki òf paki, sòpi den bleki, funchi i chukulati.

Basá riba e resultadonan di e investigashon, Fundashon pa Konsumidó a konstatá   diferensianan di preis ku ta varia entre fl.0,09 i fl. 17,87. Pa loke ta trata e kategoria di piská por a nota diferensianan di preis ku ta varia entre fl. 5,30 i fl. 17,87. Por ehèmpel, un kilo di dradu ta kosta fl. 15,69 na Boulevard Market Place i na Vreugdenhil fl. 24,00 lokual ta fl. 8,31 mas karu. Un konsumidó ta paga na Exito fl. 45,00 pa un kilo di karko, siendo ku na Vreugdenhil e preis ta fl. 62,87, un diferensia di fl. 17,87. Mangusa Rio i Mangusa Hypermarkt ta bende mula pa fl. 18,55 pa kilo, miéntras ku na Arco Iris e ta kosta fl. 23,85, lokual ta fl. 5,30 mas karu. Boulevard Market Place ta bende un kilo di piská kòrá pa fl. 17,95, miéntras ku na Bon Bini e ta kosta fl. 24,33 ku ta fl. 6,38 mas karu.

Mas barata, mas karu i mihó surtí         

Mangusa Hypermarkt a resultá e supermerkado ku tabatin 130 di e 157 produktonan ku a keda kompará, pues el a resultá esun mihó surtí. Den nos makutu di produktonan kompará, Mangusa Hypermarkt a resultá tambe e establesimentu ku mayoria produkto pa uso den temporada di kuaresma na un preis mas barata. Na 28 okashon e supermerkado aki tabatin e preis di mas abou. Na di dos lugá a resultá Bon Bini Supermarket kende tabatin na 26 okashon e preis di mas abou.

For di e análisis di e komparashon di preis aki, Colon Supermarket tabata e supermerkado ku mayoria di e produktonan kompará na un preis mas haltu.

Fundashon pa Konsumidó a pone tur e produktonan den un tabèl pa tur konsumidó por haña un bista mas amplio di e diferente preisnan den e diferente supermerkado- i minimarketnan. Pa kada konsumidó ku ke tin un mihó bista riba e produktonan i nan preis na e diferente establesimentunan Fundashon pa Konsumidó a pone tur e produktonan den un tabèl. Pa konsulta e tabelnan, klek aki.

Pa mas informashon por mail nos na nos email: info@fundashonpakonsumido.org, yama nos riba e number di telefòn: 462-6666 òf bishitá nos ofisina na De Ruyterkade 53 na Punda.

Fundashon pa Konsumidó ta deseá pueblo di Kòrsou felis Pasku di Resurekshon

 

Download dokumento:

Klek riba e link pa download.

KOMPARASHON DI PREIS MAKUTU DI KARNAVAL (Jan. 2015)

Den e  temporada di Karnaval aki Fundashon pa Konsumidó ke alertá tur konsumidó pa pone ekstra atenshon riba kalidat di e produktonan di konsumo.

Bo salud meskos ku bo potmoni ta bo responsabildat.

Pa e temporada di Karnaval aki atrobe Fundashon pa Konsumidó konhuntamente ku Ministerio di Desaroyo Ekonómiko a hasi un komparashon di preis di e produktonan for di e makutu di Karnaval. Ministerio di Desaroyo Ekonómiko a hasi anotashon di preis  riba produktonan mas kumprá pa e konsumidónan durante e temporada aki. For di investigashon aki a resultá ku Bon Biní Supermarket i e supermerkadonan Mangusa Hypermarket i Mangusa Rio tabatin mayoria produkto na un preis mas abou miéntras ku Mangusa Hypermarket i Mangusa Rio a resultá di ta e supermerkadonan ku mas tantu di e produktonan riba nos lista  den rèki na momentu di anotashon.

A kompará un total di 142 produkto den e komparashon di preis aki. E kòntròl di preis a tuma lugá entre 15 di yanüari i 29 di yanüari 2015. Inspekshon Ekonómiko a bishitá 26 diferente supermerkado i minimarket. Durante di e investigashon aki a hasi un komparashon di preis di produkto di e mesun sorto, marka i peso i no a kompará kalidat di e produktonan den e kategoria di karni.

Pa e komparashon aki, e produktonan a ser repartí den 25 kategoria kual ta: awa mineral, djus den paki, djus den bleki, stropi di limonada, limonada, sódawater, serbes, wiski, ròm, biña, snèks, karni, sosèshi,  tuna den bleki, macaroni, bèrdura den bleki, mayonès, kèchùp, mòstert, papel di waks i fòil di aluminio, nèpkin, kùp di plèstik, kùp di plèstik, kùp di fóm, tayó di fóm, bestèk di fóm.

E supermerkado- i minimarketnan ku a wòrdu bishitá ta: 2000, Arco Iris, Arti’s, Best Buy, Bon Biní, Boulevard Marketplace, Centrum Mahaai, Centrum Piscadera, Colón, Esperamos, Exito, Goisco, Mangusa Rio, Mangusa Hypermarket, San Pedrio, Vreugdenhil, Minimarket Beurs, Minimarket Feicui, Minimarket Bonam, Minimarket Queens, Minmarket Aquasol, Minimarket Wah Sang, Minimarket Kenny’s, Minimarket Luna Park, Minimarket Centro i Minimarket Sta. Maria.

Análisis

Remarkabel den e investigashon aki ta ku durante e análisis tabatin diferensia grandi di preis entre e establesimentunan; sigur pa loke ta trata e kategoria di bebidanan alkohóliko. Por ehèmpel na Arco Iris un bòter di wiski Johnny Walker Black Label di 750 ml ta kosta fl.58.95, miéntras ku e mesun bòter di wiski Johnny Walker Black Label di 750 ml aki ta kosta fl. 89.55 na Best Buy. Un diferensia di fl. 30.60 entre e preis di mas karu i esun di mas barata. Tambe den e wiski Red Label di Johnny Walker nos por a konstatá diferensia grandi di preis. Miéntras ku Bon Biní ta bende un bòter di wiski Johnny Walker Red Label di 750 ml pa fl. 31.85, e preis di mas barata, Best Buy ta bende e mesun bòter di wiski aki pa fl. 49.99. Un diferensia pues di fl. 18.14 entre e preis di mas abou i esun di mas haltu.

Den e kategoria di serbes tambe Fundashon pa Konsumidó por a konstatá diferensianan konsiderabel den preis. Miéntras ku 1 kaha di serbes den bòter di marka Polar ta kosta fl. 30.06 na Centrum Piscadera, Supermerkado 2000 ta bende e mesun kaha di serbes aki pa fl. 46.00. Un diferensia pues di fl. 16.94 entre e preis di di mas barata i esun di mas karu. Den e preis di 1 kaha di serbes di marka Heineken tambe nos por a konstatá diferensia konsiderabel den preis. Miéntras ku 1  kaha di serbes den bòter di marka Heineken di 25 cl ta kosta fl. 48.34 na Centrum Piscadera, Minimarket Centro ta bende e mesun kaha di serbes aki pa fl. 62.08. Un diferensia pues di fl. 13.74 entre e preis di mas barata i e preis di mas karu.

Pa kada konsumidó tin un mihó bista riba e produktonan i nan preis na e diferente establesimentunan Fundashon pa Konsumidó a pone tur e produktonan den un tabèl. Pa konsulta e tabelnan, klek aki.

Pa mas informashon por mail nos na nos email: info@fundashonpakonsumido.org, yama nos riba e number di telefòn: 462-6666 òf bishitá nos ofisina na De Ruyterkade 53 na Punda.

Fundashon pa Konsumidó ta deseá pueblo di Kòrsou felis temporada di Karnaval.

KOMPARASHON DI PREIS MAKUTU DI PASKU (Dec. 2014)

MANGUSA MAS BARATA I MIHÓ SURTÍ

Den luna di dezember e departamentu di Inspekshon Ekonómiko a bishitá nos supermerkadonan pa anotá preis di e produktonan den nos makutu di Pasku. A anotá preis di un total di 109 produkto for di varios kategoria manera speshalidat di Pasku ku produktonan manera ham i orea, biña, rum, serbes, limonada, anasa den bleki, hariña i algún otro kategoria. Fundashon pa Konsumidó a hinka e sifranand den un tabèl i a analisá e sifranan pa asinei informá nos konsumidónan na unda ta bende   e produktonan na e preis di mas barata. Nos tin ku remarká un biaha mas ku solamente nos ta hasi komparashon di e preis i no di e kalidat di e produkto; pues esaki por tin influensha riba e preis.

Esperamos, Mangusa Rio i Mangusa Hypermarket mihó surtí; Mangusa mas barata

For di e sifranan nos por konkluí ku pa loke ta trata nos makutu di Pasku e supermerkadonan Esperamos, Mangusa Rio i Mangusa Hypermarket a resultá e supermerkadonan mihó surtí. Na momentu ku a bishitá e establesimentunan tur 3 establesimentu tabatin 88 di e 109 produktonan di nos makutu, den rèki. Ademas di a sali e supermerkadonan mihó surtí, e supermerkadonan Mangusa Rio i Mangusa Hypermarket a sali e supermerkadonan di mas barata ku un total di 19 di e 109 produkto den nos makutu di Pasku, na e preis di mas abou.

Speshalidat di Pasku: Mangusa Rio i Mangusa Hypermarket mihó surtí

Mangusa Rio i Mangusa Hypermarket a resultá di ta e supermerkadonan mihó surtí pa loke ta trata nos produktonan di speshalidat di Pasku. Tur dos supermerkado tabatin tur 15 produkto den e kategoria ‘speshalidat di Pasku’ den rèki ora kolabordónan di Ministerio di Desaroyo Ekonómiko a pasa pa anotá preis. E supermerkadonan Centrum Mahaai i Centrum Piscadera tambe tabata bon surtí na momentu ku a pasa pa anotá preis ku 14 di e 15 produktonan den e kategoria di ‘speshalidat di Pasku’ den rèki.

Remarkabel ta ku den e kategoria aki nos por a tuma nota di diferenshanan den preis konsiderabel. Di e 15 produktonan den e kategoria aki, 9 di nan tabatin un diferensha di mas ku 6 florin den e preisnan. Por ehèmpel:  miéntras ku Centrum Piscadera i Centrum Mahaai ta bende 1 kilo di makrel ku wesu na un e preis di mas abou ku ta fl. 15.26, Goisco ta bende esaki pa fl. 26.95; un diferensha pues di fl. 11.69 den e preis. Den e preisnan di salmou di Canada tambe tabatin diferensha konsiderabel den e preisnan. Miéntras ku Supermerkado Exito ta bende 1 kilo di salmou di Canada na e preis di mas abou ku ta fl. 39.50, supermerkado Vreugdenhil ta bende esaki na e preis di mas karu ku ta fl. 50.50 pa kilo. Un diferensha pues di fl. 11.00 den e preis pa kilo.

Bebidanan alkohóliko

E makutu di Pasku ademas di speshalidatnan di Pasku tambe ta kontené algun kategoria di bebidanan alkohóliko manera biña, ròm, wiski i serbes. Den e kategorianan aki tambe nos por a mira diferenshanan hopi grandi den preis. E diferensha di mas grandi ku nos por a tuma di dje tabata den e preis di Johnny Walker Black Label di 2 liter. Miéntras ku Arco Iris ta bende esaki na e preis di mas barata ku ta fl. 119.00, Centrum Mahaai i Centrum Piscadera ta bende esaki na e preis di mas karu ku ta fl. 149.33. Un diferensha pues di fl. 30.33 den e preis. Tambe den e preis di bleki di Amstel pa krat nos por a tuma nota di diferenshanan hopi grandi den e preis. Miéntras ku Alves Supermarket ta bende 1 krat di bleki di Amstel na e preis di mas abou ku ta fl. 39.89, Colon Supermarket ta bendé na e preis di mas karu ku ta  fl. 59.45; un diferensha pues di fl. 19.56 den e preis.

Fruta den bleki i fruta seku

Fruta den bleki i fruta seku tambe ta un di e kategorianan ku nos a wak diferenshanan grandi den  preis. Den e kategoria aki tabatin 12 produkto. Den 6 di e 12 produktonan aki tabatin un diferensha den e preis di mas ku fl. 7.00; algun mas ku fl. 17.00. E diferensha di mas grandi tabata den cherry kòrá i cherry bèrdè; sigur importante pa esun ku ke traha bolo. Miéntras ku 1 kilo di cherry kòrá ta kosta fl. 18.56 na Centrum Piscadera, ku tin e produkto na e preis di mas barata, Boulevard Market Place ta bende 1 kilo di cherry kòrá na e preis di mas karu, kual ta fl. 35.95. Un diferensha pues di fl. 17.39 den e preis. Cherry bèrdè tabata mas barata na Vreugdenhil Supermarket, na un preis di fl. 12.82 pa kilo, miéntras ku Boulevard Market Place ta bende 1 kilo di cherry bèrdè pa fl. 29.95; un diferensha pues di fl. 17.13 den e preis pa kilo. Den e preis di prèimu tambe tabatin diferenshanan konsiderabel. Miéntras ku Esperamos Supermarket ta bende 1 kilo di prèimu na e preis di mas barata ku ta fl. 12.67, Exito Supermarket ta bende 1 kilo di prèimu na e preis di mas karu ku ta fl. 25.50. Un diferensha den e preis p kilo di fl. 12.83.

Komo ku tin asina tantu diferensha den e preisnan di e produktonan, nos ke apelá na nos konsumidónan pa konsultá e tabèl promé ku bo bai hasi kompras pa Pasku. E por skapa bo pòtmòni basta sèn.

Di nos banda nos ke deseá nos konsumidónan un bon Pasku i un prospero aña 2015!

Download dokumento:

Klek riba e link pa download.

KOMPARASHON DI PREIS MATERIAL DI KONSTRUKSHON (Nov. 2014)

Na fin di novèmber Fundashon pa Konsumidó a hasi un komparashon di preis di material di konstrukshon ku ta wòrdu bendí riba nos merkado. Pa esaki nos a bishitá 8 diferente hartwèr ku ta bende material pa konstrukshon na Kòrsou.

Fundashon pa Konsumidó a inventarisá preisnan di e material pa konstruí un kas di fundeshi te na dak. A kompará produktonan manera betonmat, betonijzer, kokerprofiel, hoekijzer, Groove Pine, palu, porta, kozèin, pvc buizen, pvc stukken, pipa di koper, etèrnit, dakpannen, zinkplaten, plafond platen, multiplex, betonplex, pego, joint compount, boormachine,zaagmachine, cut off sew machine i fèrf. Kolaboradónan di Fundashon pa Konsumidó a bishitá i kompará preis na e siguiente hartwèrnan: Kooyman, Gomez Entrerprises, Marchena Hardware, Ferreteria Skèrpènè, Dijtham, Building Depot, Wema i Staal Antillen.

Mirando ku kada un di e diferente empresanan ku nos a bishitá a skor bon den un òf mas kategoria di e komparashon di preis aki, ta konsehabel pa studia e posibilidat di kumpra bo materialnan na diferente hartwèr. Akinan nos ke remarká sí ku artíkulonan di konstrukshon ta ser importá for di deferente merkado i pais. E echo aki por tin influensha riba kalidat i preis di e diferente artíkulonan. Ta importante pa kada un di nos tene kuenta ku esaki ora ta hasi kompra.

Analisando e komparashon di preis nos por konkluí ku tin hartwèr ku ta skor mihó ku otro den sierto kategoria.

Algun konklushon for di e análisis:

Pa palu, bo mester ta na Building Depot;

Betonmat i betonijzer, ta kumbiní bo kumpra na Staal Antillen;

Pa PVC hulpstukken schroef-cap shinishi, wak promé na Building Depot;

Pa pipanan PVC shinishi, Dijtham ta resaltá

Multiplex ta mas barata na Wema;

Den e sekshon di etèrnit, Gomes Enterprises ta resaltá ku su preisnan;

Pa kokerprofiel, ta na Building Depot bo mester ta.

 

Pa fasilidat Fundashon pa Konsumidó a pone e diferente materialnan di konstrukshon den un tabèl, di moda ku kada konsumidó por haña un bista mas amplio di e surtido i preis ku e diferente establesimentunan ta ofresé.

 

Marchena Hardware no ta aparesé den e tabèl menshoná dor ku na momentu di e anotashon di preis, e preisnan di e artíkulonan tabata sin OB, kontralí na loke lei ta preskribí.

Por pidi e tabèl via email: info@fundashonpakonsumido.org òf tuma kontakto ku nos ofisina.

Tambe bo por wak e tabèl aki.

Kumpra konsiente i evitá problema

Komo konsumidó sòru semper pa delantá bo sa kiko bo ta buskando. Promé ku kumpra, bo mester kompará preis, kalidat, garantia i servisio. Paga tinu ora di firma pa risibí un produkto, pasombra tin ora bo ta firma tambe pa e kondishon di e produkto, o sea si e ta den bon estado òf nò. Semper kontrolá, no firma sin kontrolá! Si bo no por a kontrolá e produkto, pone esaki riba e papel i ku bo ta firma solamente pa risibí e produkto. Eksigí pa tur palabrashon ta riba papel, preferiblemente riba bo bòn. No paga pa bo artíkulo si bo no tin e  informashon ku e ta den stòk.

KOMPARISHON DI PREIS BACK 2 SCHOOL 2014 (Juli 2014)

Back to school 2014

Fakansi grandi ta yegando na su fin i e aña eskolar nobo ta den porta. Pa e aña eskolar nobo nos muchanan mester di diferente artíkulo nobo pa bai skol kuné. Ya ku mayornan tin un periodo kòrtiku pa kumpra artíkulonan ku nos muchanan mester usa henter e aña eskolar, Fundashon pa Konsumidó ku koperashon di Ministerio di Desaroyo Ekonómiko a disidí di duna nos mayornan un man.

Ministerio di Desaroyo Ekonómiko den e periodo di 14 di yüli pa 21 yüli di 2014 a bishitá 20 establesimentu ku ta bende artíkulonan pa skol i a anotá e preisnan i material disponibel. A anotá preis di un total di 64 produkto. E establesimentunan ku a partisipá den e komparashon di preis aki ta:

Samson Chobolobo, Samson Digital Plus, Samson Colon, Samson Jan Noorduynweg, Office Stop, Martis Agencies, Curacao Office Systems, Mensing’s Caminada, Multi Centrum 2000, Señor Barata Sta. Maria, Señor Barata Sta. Rosa, La Curacao Jan Noorduynweg, Bruna, Dovester Saliña, Dovester Gosieweg, Dovester Sta. Maria, Curacao Office Supply, Casa Cesar, Building Depot i Home Plus.

Fundashon pa Konsumidó a pidi algun skol di VSBO duna nos informashon tokante e artíkulonan ku nan alumnonan mester tin pa e aña eskolar benidero i a wak na tur 20 establesimentu kuantu ta sali pa kumpra e artíkulonan aki. Nos tin ku remarká ku no ta tur establesimentu ta bende e mesun markanan i tin tur produkto den stòk. Nos komparashon di preis ta duna pues un impreshon di diferensha di preis i disponibilidat di produktonan na momentu di  e anotashon i no di kalidat i durabilidat di e artíkulonan kompará.  Pues semper komo kumpradó, kontrolá i kompará material i konstrukshon di e produkto pa asina bo tin un bon impreshon di su kalidat.

Riba e lista ku nos a risibí di skol pa loke ta trata material ku e mucha mester tin pa e aña eskolar nobo tin e siguiente artíkulonan:

Schrift                                                                                      Otro artíkulonan nesesario

20 taalschrift                                                                           – linial di 30 cm

8 ruitjesschrift (5 mm)                                                          – paser

– Geo-driehoek

Dikshonario                                                                             – Skèr

Dikshonario Hulandes Prisma                                                  – Gum

Dikshonario Ingles – Hulandes Prisma                                   – Agènda sin plachi

Dikshonario Spañó – Hulandes Prisma                                   – Leim

– Casio Scientific Calculator fx-82 ES

Material pa skibi                                                                     – Sleiper normal

5 pen blou                                                                               – 5 map Leitze

2 pen pèn kòrá                                                                        – Ordner (Map di renchi)

7 pòtlot HB                                                                              – Hus di plèstik (10x)

2 highlighters                                                                          – Beibel na Papiamentu

Steft (6x)

Pòtlot di koló (12x)

Nos tin ku remarká na promé lugá ku na momentu ku a bai anotá preis, no a anotá preis di dikshonario Hulandes Prisma, lokual ta nifiká ku e artíkulo aki no ta den e lista di artíkulonan.

No tabata tin niun establesimentu ku tabatin tur e artíkulonan ariba menshoná den rèki.

Samson Colon, Samson Chobolobo, Samsom Digital Plus, Samson Jan Noorduynweg, Mensing’s Caminada, Casa Cesar, Martis Agencies, Building Depot i Señor Barata Sta. Maria tabata e establesimentunan ku tabatin mayoria di e produktonan riba e lista di skol den rèki na momentu ku Ministerio di Desaroyo Ekonómiko a pasa pa anotá e preisnan.

E artíkulonan nesesario na e preis di mas abou

Di tur e establesimentunan Casa Cesar a sali e establesimentu kaminda e mayor por haña e artíkulonan riba e lista di skol na e preis di mas abou, ounke ku e skrefnan ta di tamaño mas chikí ku normal i e paki di steft ta bini ku 12 na lugá di 6. E mayor ku bai Casa Cesar ta haña tur e artíkulonan riba e lista na un preis di NAf. 164,80.

Mihó surtí

Mensing’s kaminada a sali e establesimentu mihó surtí ku 61 di e artíkulonan di kua a anotá preis den rèki, sigui pa Martis Agencies ku 60 i Samson Colon ku 56 di e artíkulonan di kua a kue preis.

Dikshonario

Manera por mira riba e lista, e muchanan tambe mester ta disponé di 1 Dikshonario Hulandes (Prisma), 1 Dikshonario Ingles – Hulandes (Prisma) i 1 Dikshonario Spañó – Hulandes (Prisma).

Manera a remarká promé, no a kue preis di Dikshonario Hulandes. Pa loke ta trata Dikshonario Ingles – Hulandes (Prisma), e establesimentu Bruna ta bende esaki na e preis di mas abou ku ta NAf. 28,10, miéntras ku Mensing’s Caminada ta bende Dikshonario Spañó – Ingles na e preis di mas barata, ku ta NAf. 30,20.

Beibel na Papiamentu

Di tur e establesimentunan ku a bishitá, solamente Martis Agencies tabata bende Beibel na Papiamentu. E preis di e artíkulo aki ta: NAf. 23,00.

Leim marka Collal (100 ml)

Nos a ripará diferensianan tambe notabel pa lokual ta trata leim (Collal) i ke a pone abo komo konsumidó na altura di esaki. Curaçao Office Supply ta bende esaki na e preis di NAf. 5,25, miéntras e establesimentu ku ta bende e artíkulo aki na e preis di mas karu ta Building Depot na e preis di NAf. 8,50. Pues OJO!

Fundashon pa Konsumidó a pone e preisnan di tur e artíkulonan den un tabèl pa asina e konsumidó por haña un bista mas amplio di e diferente preisnan den e establesimentunan. E tabèl aki sigur ta fasilitá nos mayornan den e búskeda di artíkulonan eskolar na un preis kumbiniente i ta hasi posibel pa kada mayor a base di e tabèl traha nan mes pakete Back to School.

Pues tuma kontakto ku Fundashon pa Konsumidó via e-mail info@fundashonpakonsumido.org, telefon 462-6666 òf pasa na De Ruyterkade 53 pa haña un kopia di e resultado di nos komparashon di preis Back to School. Pa wak e tabèlnan, klek aki…!

 

 

 

 

Komparashon di preis di kuaresma 2014

Ta kumbiní bo kumpra na mas ku un supermerkado

Entre 18 i 28 di mart 2014,  Inspekshon Ekonómiko di Ministerio di Desaroyo Ekonómiko a anotá preis di produktonan ku mas ta wòrdu kumprá durante di e temporada di kuaresma. Mayoria di e produktonan riba e lista di anotashon ta produktonan di laman manera tuna, salmou, makrel, saldinchi i otro piskánan manera dradu, tilapia i piská kòrá i algun produkto básiko. Tambe a anotá preis di algun fruta i bèrdura. E komparashon di preis di produktonan di temporada di kuaresma aki ta un kolaborashon entre Fundashon pa Konsumidó i Ministerio di Desaroyo Ekonómiko, den kua Inspekshon Ekonómiko a anotá preis di un lista konteniendo 154 produkto. Fundashon pa Konsumidó na su turno a hasi un análisis di e preisnan i publiká e resultado.

 

 

Supermerkado Bon Biní mas barata

A base di nos análisis di e preisnan, nos por konkluí ku e supermerkado Bon Biní a sali e supermerkado mas barata ku mas tantu produkto di e selekshon na un preis di mas abou. Di e 154 produkto kompará na e diferente supermerkadonan, Bon Biní Supermakrket tabatin 34 produkto na e preis di mas kumbiniente. Supermerkado Mangusa Rio ta haña e di 2 puesto ku 33 di 154 produkto na e mihó preis, miéntras ku Mangusa Hypermarket ta okupá e di 3 puesto ku 29 di e 154 produktonan riba e lista di anotashon na e preis di mas abou.

Mangusa Hypermarket mihó surtí

E supermerkado ku mas tantu produkto riba e lista di anotashon den stòk na momento ku a hasi e anotashon di preis a resultá di ta Mangusa Hypermarket. Mangusa Hypermarket tabata bende 118 di e 154 produktonan na momento ku a bishitá e supermerkado pa anotá preis. E di 2 puesto pa e supermerkado mihó surtí ta bai pa supermerkado Bon Biní ku un total di 114 di e 154 produktonan di e lista di anotashon den stòk na momentu ku a bishitá e establesimentu pa anotá preis, miéntras ku a base di nos análisis Mangusa Rio ta okupá e di 3 puesto ku 106 di e 154 produktonan riba e lista di anotashon den stòk na momentu ku a bishitá e supermerkado.

Diferensia grandi den preis di filèt di salmou i karkó

For di e resultadonan di e komparashon di preis Kuaresma, Fundashon pa Konsumidó a tuma nota di algun produkto ku diferensia konsiderabel den preis. Filèt di salmou ta e produkto ku nos a nota e diferensia di mas grandi den preis. Miéntras ku  supermerkado Esperamos ta bende 1 kilo di Filèt di salmou na e preis di mas barata ku ta fl. 31.74, Boulvard Market Place ta bende esaki na e preis di mas karu kual ta fl. 47.70; un diferensia pues di fl. 15.96 ku ta un diferensia konsiderabel!

Un otro produkto ku tambe nos a konstatá un diferensia basta grandi den su preis ta karkó. Miéntras ku e supermerkadonan Centrum Mahaai i Centrum Piscadera ta bende 1 kilo di karkó na e preis di mas barata ku ta fl. 44.46, Alves  Supermerket ta bende esaki na e preis di mas karu kual ta fl. 59.63; un diferensia pues di fl. 15.17. Otro diferensia den preis konsiderabel. E 2 produktonan aki sigur ta e produktonan ku diferensia den preis di mas notabel. Tene semper na kuenta ku den e investigashon aki a kompará solamente preis i no kalidat di e produktonan. Ta p’esei Fundashon pa Konsumidó ta hasi un apelashon na tur konsumidó pa wak bon kiko nan ta kumpra, kompará preis, pero tambe kalidat, wak fecha di vensementu di e produkto promé ku kumpra. Banda di esaki Fundashon pa Konsumidó ta keda hasi e petishon na komersiante pa pone mas tantu informashon posibel riba su produktonan, manera pais di origen, informashon tokante kalidat di e produkto pa asina e konsumidó por hasi su eskoho no solamente a base di preis pero tambe di otro faktornan ku por tin influensha riba e preis di benta. Finalmente mester remarká ku komparando e total di preisnan mas karu ku esnan mas barata na e diferente supermerkadonan nos ta mira un diferensha enorme di fl. 220.41. Pues ta bale la pena tuma nota di e preisnan i hasi bo kompra na mas ku un supermerkado.

Tep ora bai supermerkado i kumpra piská fresku

  • Ora ta kumpra piska tene kuenta tambe ku e siguiente puntonan pa bo por evaluá si e piska ta fresku: 
  • E wowo di e piska no mester ta kòrá, si no ta trata di un piska ku a para hopi;
  • E piska no tin mag di ta moli, kaminda bo pone bo dede riba e piska e no mag hundi bai aden;
  • Skama di e piska mester ta lombra;
  • Pone èkstra atenshon ora ta kumpra piska ku ta wòrdu tené den eis, pasombra e eis ta evitá ku e piska ta bira moli i e ta konserva e lusides di e skamanan;
  • Kaminda a saka e kaikai di piska mester tin kolo di sanger, e no por ta koló pretu;
  • E piska no mag di tin un holó straño. Si e hole djis un tiki straño, ta rekomendabel pa no kumpr’é.

Fundashon pa Konsumidó a pone tur e produktonan den un tabèl pa e konsumidó por haña un bista mas amplio di e diferente preisnan den diferente supermerkado.

Pa wak e tabel, klek aki.

Komparashon di Preis Makutu di Pasku i Fin di aña 2013

Fin di aña  ta e tempu pa gosa ku famia anto manera nos tur sa, kuminda ku bebida no por keda afó! Fundashon pa Konsumidó den e luna di dezèmber a hasi un komparashon di preis na diferente supermerkadonan. A anotá preis di un lista di produktonan pa konsumo i bebídanan ku ta karakterisá nos selebrashon di Pasku na Kòrsou manera ayaka, ham, salmou, serbes, biña, rum i produktonan pa bo mes traha bo ayaka i otro pasapalunan speshal pa temporada di Pasku. E anotashon di e preisnan a tuma lugá entre 6 i 10 di dezèmber 2013. Nos tin ku bisa ku e preisnan ta sin O.B. komo ku diferente supermerkado ainda no a kambia nan preisnan pa asina inkluí O.B. den nan preisnan ounke ku for di 1 òktober 2013 kada negoshi mester stipulá nan preisnan inkluso O.B.

Mihó preis kategoria “speshalidat di Pasku”

Den e kategoria di speshalidat di Pasku e supermerkadonan Centrum Mahaai, Bon Biní i Esperamos a skor mihó ku kada unu 3 produkto riba nos lista na e mihó preis. Na supermerkado Centrum Mahaai bo ta haña pekelé (pa kilo) pa ANG. 16.67 , ham sin wesu (pa kilo) pa ANG. 12.25, kalakuna pa yena (pa kilo) pa ANG. 8.73, e preisnan di mas kumbiniente segun nos resultadonan.

En kambio, pa pekelé ku wesu (pa kilo) na un preis di ANG. 16.50, makrel ku wesu (pa kilo) na un preis di ANG. 16.83 òf salmou ku wesu (pa kilo) na un preis di ANG. 29.50, ta na Supermerkado Bon Biní bo tin ku pasa. Na supermerkado Bon Biní bo ta haña e 3 produktonan aki na e preis di mas kumbiniente.

Si bo ta buskando ham ku wesu, galiña hinté pa yena òf pechu di galiña (filet) na e mihó preis, ta na Esperamos Supermarket bo tin ku pasa. Na Esperamos Supermarket bo ta kumpra ham ku wesu (pa kilo) na un preis di ANG. 6.25, galiña hinté pa yena (pa kilo) na un preis di ANG. 4.75 i pechu di galiña (pa 2 kilo) na un preis di ANG. 13.80.  Por sierto, ademas di Esperamos Supermarket, Supermerkado Alves, Supermerkado Mangusa Rio i Mangusa Hypermarket tambe ta bende ham ku wesu (pa kilo) na e preis di ANG. 6.25.

Mihó preis i mihó surtí komparashon di preis

For di e resultadonan kompletu di nos komparashon di preis makutu fin di aña supermerkado Bon Biní a skor mihó ku 23 di 123 produkto riba nos lista na mihó preis. Mangusa Rio a sali na di 2 lugá pa loke ta trata mihó preis ku 21 di e 123 produkto riba nos lista na e preis mas kumbiniente, miéntras ku supermerkado Centrum Mahaai ta okupá e di 3 puesto pa loke ta trata mihó preis ku 17 di e 123 artíkulonan riba nos lista na e preis di mas abou.

Pa loke ta trata e supermerkado ku a sali mihó surtí tin ku bisa ku supermerkado Alves a bai ku e promé lugá ku 95 produkto di e 123 produkto riba nos lista den rèki.  Supermarket Mangusa Rio a sali na di 2 lugá ku 94 produkto di e 123 produktonan riba nos lista den rèki, miéntras ku Mangusa Hypermarket a sali na di 3 lugá ku 92 di e 123 produktonan riba nos lista den stòk.

Fundashon pa Konsumidó tambe a kue preis di produktonan manera fruta (seku), snèks, pasta, anasa den bleki i bebídanan manera serbes, wiski i limonada i algun otro kategoria. Pa fasilidat di nos konsumidónan Fundashon pa Konsumidó a pone tur e produktonan den un tabèl pa asina e konsumidó por haña un bista mas amplio i kla di e supermerkadonan kaminda e produkto ta mas barata i esun ku tin e produkto na e preis mas karu.

Pa download bo tabèl klek aki!

Komparashon di preis di fèrf (Decèmber 2013)

KOMPARASHON PREIS DI FÈRF FIN DI AÑA

Komo ku fin di aña ta aserkando i nos gusta tin nos kasnan nèchi di fèrf pa pasa pasku i aña nobo, Fundashon pa Konsumidó a hasi un komparashon di preis di fèrf na diferente lokalidatnan ku ta bende fèrf. A anotá prèis for di e siguiente lokalidatnan: Kooyman Group, Gomez Enterprises, Marchena Hardware, Ferreteria Skèrpènè, Pinturas Uno, Paula Verfcentrum, Building Depot, Wema i Antilliaanse Verffabriek. A anotá prèis di e markanan ku bo por haña na más ku 1 establesimentu i tambe marka propio (eigenmerk) di e estabelsimentunan. E markanan di fèrf ku a anotá den e komparashon di prèis ta: Comotex, Comotin, Comolux Enamel, Benjamin Moore i marka propio di algún di e establesimentunan ku ta: Kooyman ku su marka propio “Colortex”, Gomez Enterprises ku su marka propio “Super” i Building Depot ku su marka propio “Colour Solution”.

Fèrf blanku pa muraya (Wall paint: White)

For di nos komparashon di prèis di fèrf blanku pa muraya, nos por konkluí e konsumidó por haña ferf blanku na diferente midí (sea ¼, 1 òf 5 galòn) na tur establesimentu ku nos a bishitá. E marka i prèis si ta varia entre e establesimentunan. Si bo ta buskando fèrf blanku pa muraya na midí di ¼ galòn, Paula Verfcentrum ta bende esaki, marka “Comotex”,  na e prèis di más barata ku ta ANG. 10.00. Den e kaso ku bo ta buskando fèrf blanku pa muraya na midi di 1 galòn, Gomez Enterprises  ta bende esaki, marka “Comotin”,  na e prèis di más barata ku ta ANG. 26.95. Si bo ta buskando fèrf blanku pa muraya pa un proyekto más grandi i bo mester di 5 galòn di fèrf, Building Depot ta bende esaki, marka “Comotex”,  na e prèis di más barata ku ta ANG. 119.00.

Fèrf di koló pa muraya (Wall paint: Colors)

Segun nos komparashon di prèis, fèrf di koló, kontralí na e situashon di fèrf blanku pa muraya,  no ta optenibel na tur e establesimentunan ku nos a bishitá.  E marka i preis ku bo ta paga pa fèrf di koló pa muraya tambe ta varia entre e diferente establesimentunan. Si bo ta buskando fèrf di koló pa muraya na midí di ¼ galòn, Kooyman Group ta bende esaki, marka “Colortex”, na e prèis di más barata ku ta ANG. 16.99. “Colortex” ta un marka propio di fèrf di Kooyman Group. Den e kaso ku bo ta buskando fèrf di koló pa muraya na midí di 1 galòn, Gomez Enterprises ta bende esaki, marka “Comotin”, na e prèis di más barata ku ta ANG. 29.25. Si bo ta buskando fèrf di koló pa muraya pa un proyekto más grandi i bo mester di 5 galòn di fèrf, Gomez Enterprises ta bende esaki, marka “Super” , na e prèis di más barata ku ta ANG. 169.95. “Super” ta un marka propio di fèrf di Gomez Enterprises.

Fundashon pa Konsumidó no solamente a kompará prèis di fèrf di muraya pero tambe otro tipo di fèrf, “primers”, vèrnís, “thinners” i más. Pa fasilidat di nos konsumidónan Fundashon a pone tur e produktonan den un tabèl pa asina e konsumidó por haña un bista mas amplio i kla di e establesimentu kaminda e produkto ta mas barata i esun ku tin e produkto mas karu.

Pa download e tabelnan klek aki.!

Download dokumento:

Klek riba e link pa download.

Komparashon di preis di karni i komestibel (Ougustùs 2013)

Komparashon di preis di karni i komestibel (Ougustùs 2013)

Karni i komestibel

Fundashon pa Konsumidó, siguiendo ku su análisis di komparashon di preis  supermerkado di ougùstùs, e biaha aki  ta kompará preis di karni i komestibel ku mas ta wòrdu bendí den nos supermerkadonan lokal. Den e parti di karni  nos a kompará preis di 38 produkto manera e.o. bifstùk, steak, pòrchòp, galiña, karn’i baka, karn’i kabritu, karn’i sòpi i mondongo. Tambe a kompará preis  di algun belèg manera schouderham, turkeyham, keshi, wòrs dushi i wòrs salu. Pa e parti di komestibel nos a kompará preis di 145 produktonan ku ta varia for di aros, hariña, bonchi, suku i zeta dushi te na kòfi, te, lechi i limonada. Tambe tin produktonan di uso manera habon pa baña, pasta di djente, toaya femenino i papel di wc. Tambe tin produktonan di kas manera habon pa laba tayó, desinfektante, blich i produkto pa kita mancha.

Mangusa Rio, esun mihó surti

A base di e komparashonnan di preis Mangusa Rio ta resultá un di e supermerkadonan mihó surti ku 153 di e 183 produktonan na benta. Na di 2 lugá a resultá Alves Supermarket ku 151 produkto di komestibel , sigui pa Mangusa Hypermarkt ku 148 produkto for di e makutu di 183 produkto.

Mangusa Rio Canario, ku mihó preisnan di karni i Alves esun mihó pa preisnan di komestibel

A base di e selekshon di produktonan den e komparashon di preis pa loke ta karni na mihó preis, Mangusa Rio Canario i Centrum Piscadera ta resultá e supermerkadonan ku mas tantu produkto di karniseria nan mihó preis. Pa loke ta trata e parti di komestibel, Alves Supermarket i Esperamos Supermarket ta e supermerkadonan ku a skor mihó ku mas tantu produkto nan mihó preis.

Preisnan variabel di karni i komestibel

Den preisnan di karni i komestibel, Fundashon pa Konsumidó a konstatá ku tin diferensha di preis notabel entre supermerkadonan pa loke ta trata karni i komestibel. Manera kogelbeefsteak ta varia for di fl. 18,90 pa kilo (Mangusa Rio Canario) te ku fl. 30,99 (Albert Heijn). Sirloin Steak ta varia for di fl. 18,50 pa kilo (Centrum Mahaai) te ku fl. 32,06 pa kilo (Centrum Piscadera). Preis di Ribeye pa kilo ta varia for di fl. 19,25 (Bon Bini Supermarket) te ku fl. 54,99 (Albert Heijn).  Preis di un kilo di pòrchòp ta varia for di fl. 8,60 (Centrum Mahaai) te ku fl. 22,99 (Albert Heijn).

Pa loke ta komestibel, preis di aros Blue Ribbon (brùin 25 lbs) ta varia for di fl. 33.43 ( Alves Supermarket) te ku fl. 37,59 (Vreugdenhil). Tambe nos a tuma nota di un diferensha den preis di Vigo extra virgin 1000 ml. ku ta varia di fl. 18,25 (Boulevard Market Place) te ku fl.25,45 ( Best Buy). Aparte di kompará preis di un produkto, Fundashon a kohe preis di diferente marka di mesun produkto pa e konsumidó ku ke tin un bista mas amplio di loke nos supermerkadonan ta ofresé. Por ehèmpel den aros nos a kohe preis di 4 diferente marka, esta Mahatma, Blue Ribbon, aros Rico i Albert Heijn. Di e forma aki kada konsumidó por wak di un produkto kua marka ta kumbiní e mas sigun su eskoho, preferensha i pòtmòni.

Pa loke ta e diferenshanan konstatá den preis di produktonan di karni, Fundashon ke remarká ku den hopi kaso produktonan di karni ta ser importá for di diferente merkado i pais. E echo aki por tin influensha riba e kalidat i preis di e diferente produktonan aki. Ta importante pa kada ken tene kuenta ku esaki ora ta hasi kumpra. Ideal lo tabata si supermerkadonan kuminsá pone riba nan produktonan banda di preis, peso tambe e pais di orígen di e produktonan ya asina nos por tene kuenta ku e faktor aki tambe na momentu di kumpra.

Kumpra sabí, konsulta bo tabèl

Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di produktonan di karni i komestibel den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Nos rekomendashon ta pa tur konsumidó konsultá nos tabèl ku e resultadonan di e komparashon di preis ya asina semper bo ta kumpra dirigí loke ta skapabo sigur tempu i sèn!

Tur interesado ku kier haña kopia di e tabèl aki por tuma kontakto ku ofisina di Fundashon pa Konsumidó na telefon: 462-6666 òf via e-mail: info@fundashonpakonsumido.org.  Por wak e tabèl tambe via e lenk ariba.

Komparashon di preis di fruta i berdura (Ougustùs 2013)

Fundashon pa Konsumidó a realisá den luna di ougustus komparashon di preis di fruta i berdura ku mas ta wòrdu bendí den nos supermerkadonan. A kohe preis di diferente berdura  manera batata, batata dushi, yuka, tomati, promentòn, siboyo, shampiòn, blumkol, bonchi bèrdè i largu, awakati, wòrtel, prei, spinazi i tambe sla. Tambe a kohe preis di algun fruta, entre otro anasa, kiwi, bakoba, lamunchi, mandarein, pera, pluim, apel, apelsina, melon, papaya, patia i drùif. E diferente produktonan a wòrdu anotá segun preis pa kilo i preis di unidat, totalisando asina un kantidat di 77 produkto.

Alves Supermarket, esun mihó surti
A base di e komparashonnan di preis Alves Supermarket ta resultá un di e supermerkadonan mihó surti ku 40 di e 77 produktonan na benta. Na di 2 lugá a resultá Esperamos Supermarket ku 39 produkto di nos makutu di fruta i berdura, sigui pa Vreugdenhil Supermarket ku 38 produkto for di e makutu di 77 produkto.

Vreugdenhil Supermarket ku mihó preisnan di fruta i berdura
Pa loke ta kantidat di produkto na mihó preis, Vreugdenhil Supermarket ta skor mihó ku mas tantu produkto den nos makutu na un mihó preis, sigui pa Esperamos Supermarket. Di e 77 produktonan den nos makutu, Vreugdenhil Supermarket tin 16 produkto na un mihó preis, mientras ku Esperamos tin un total di 12 di e produktonan den nos makutu na un mihó preis.

Preisnan variabel
Den preisnan di fruta i berdura, Fundashon pa Konsumidó a konstatá ku tin diferensha di preis notabel entre supermerkadonan pa loke ta trata fruta i berdura. Páprika (promentòn) hel ta varia for di fl. 5,99 pa kilo (Save-A-Lot) te ku fl. 16,95 (Goisco). Páprika (promentòn) kòrá ta varia for di fl. 5,50 pa kilo (Supermarket 2000) te ku fl. 13,49 pa kilo (Albert Heijn). Preis di siboyo kòrá pa kilo ta varia for di fl. 1,80 (Colon) te ku fl. 6,23 (Alves Supermarket). Shampiòn pa kilo ta varia for di fl. 15,00 (Mangusa Rio) te ku fl. 24,85 (Mangusa Hypermarket). Sigur un diferensia ku nos no a verwacht mirando e echo ku ta trata di e mesun kadena di supermerkado. E diferensha di preis mas grandi ku nos a enkontrá den nos anotashon di preis ta den e preisnan pa kilo di kiwi. Kiwi su preis ta varia for di fl. 3,99 pa kilo (Save-A-Lot) te ku fl. 20,84 pa kilo (Centrum Piscadera). Tambe nos a tuma nota di un diferensha notabel den preis di batata hulandes. E preis di batata hulandes pa 20 kilo ta varia for di fl. 23,95 (California Supermarket) te ku fl. 39,95 (Exito Supermarket). Pues diferenshanan di mas ku fl. 16,00 den preis di e produktonan aki.

Interesante pa sa
Fundashon pa Konsumidó, analisando e preisnan di supermerkadonan di mesun kadena, a nota ku di e 27 produktonan ku Mangusá Rio i Mangusá Hypermarket tin komun,  21 di nan e preis ta igual den ámbos supermerkado. 5 di e sobra 6 produktonan ku ta wordu bendí na ámbos supermerkado ta mas barata na Mangusa Rio.
Di otro banda, di e 23 produktonan ku Centrum Mahaai i Centrum Piscadera tin komun, ta solamente 12 produkto tabatin mesun preis den ámbos filial. Di e 11 produktonan ku e filialnan di Centrum tabatin na preisnan diferente, 7 di nan ta mas karu na Centrum Piscadera.

Kumpra sabí, konsulta bo tabèl
Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di produktonan di nos makutu di fruta i berdura den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Nos rekomendashon ta pa tur konsumidó konsultá nos tabèl ku e resultadonan di e komparashon di preis ya asina semper bo ta kumpra dirigí loke ta skapabo sigur tempu i sèn!

Pa download e tabelnan klik aki.!

Download dokumento:

Klek riba e link pa download.

Komparashon di preis Back to School 2013 (juli 2013)

Fakansi grandi ta yegando na su fin i e aña eskolar nobo ta den porta. Pa e aña eskolar nobo nos muchanan mester di diferente artíkulo nobo pa bai skol kuné. Ya ku mayornan tin solamente un periodo kòrtiku pa kumpra artíkulonan ku nos muchanan mester usa henter e aña eskolar, Fundashon pa Konsumidó atrobe a disidí di duna nos mayornan un man.

Fundashon pa Konsumidó den e periodo di 15 di yüli pa 17 yüli di 2013 a bishitá 12 establesimentu ku ta bende artíkulonan pa skol  i a anotá e preisnan i material disponibel. E establesimentunan ku a partisipá den e anotashon di preis aki ta:

Samson, Casa Cesar, Bruna, Boekplus, Office Stop, Martis Agencies, Curaçao Office Supply, Mensing’s Caminda, Multi Centrum 2000, Shop Barata, Señor Barata i La Curaçao.

Pa por a realisá e anotashon di preis aki, Fundashon pa Konsumidó a skohe 50 artíkulo di skol ku mas ta wòrdu usá den enseñansa i na kada establesimentu a wak si e artíkulonan aki ta wòrdu bendí i a anotá e preis di mas barata. E artíkulonan aki ta varia for di klatblòk te na tas di skol. E preisnan di artíkulonan aki no ta kai bou di un preis máksimo stipulá dor di gobièrnu, pues kada negoshante por pone su mes preis.

For di nos anotashon a sali na kla ku e establesimentu Mensing’s Caminada ta e esun mihó surtí di e 50 artíkulonan. E establesimentu tabatin 46 artíkulo di e 50 artíkulonan selektá. Despues di Mensing’s Caminada, Bruna ta e establesimentu mihó surtí ku un total di 40 di e 50 artíkulonan selektá den su stòk. Na di 3 lugá nos ta haña Casa Cesar i Curaçao Office Supply ku ámbos 38 di e 50 artíkulonan selektá den stòk.

Fundashon pa Konsumidó a pone e preisnan di tur e artíkulonan den un tabèl pa asina e konsumidó por haña un bista mas amplio di e diferente preisnan den e establesimentunan. E tabèl aki sigur ta fasilitá nos mayornan den e búskeda di artíkulonan eskolar na un preis kumbiniente i ta hasi posibel pa kada mayor a base di e tabèl traha nan mes pakete Back to School.

Pa habri e tabèl klek ariba FPK Back 2 School 2013.pdf

Of pasa serka nos na De Ruyterkade 53 òf tuma kontakto ku nos via e-mail info@fundashonpakonsumido.org òf via nos number di telefon 462-6666 pa haña un kopia di e resultado di nos anotashon di preis Back to School. Por wak e tabèlnan tambe riba nos wepsait: www.fundashonpakonsumido.org. 

Download dokumento:

Klek riba e link pa download.

Komparashon di preis di supermerkado (Mei 2013)

Komprashon di preis di supermerkado 2013

Despues di a publiká nos komparashonnan di preis di karni i fruta i berdura, Fundashon pa Konsumidó ta publiká awe e último parti di nos komparashon di preis di luna di mei. E komparashon di preis aki ta konsistí di produktonan di sobrá kategorianan ku mas nos ta kumpra den supermerkado. E produktonan di e makutu preselektá aki ta varia for di aros, hariña, bonchi, suku i zeta dushi te na kòfi, te, lechi i limonada. Tambe tin produktonan di uso personal manera habon pa baña, pasta di djente, toaya femenino i papel di wc. Pa limpiesa di kas, Fundashon a anotá preis di entre otro: habon pa laba tayó, desinfektante, blich i produkto pa kita mancha.

E anotashon di preis aki a tuma lugá fin di mei 2013 i manera ta kustumber Fundashon pa Konsumidó a kompará produktonan a base di marka i kontenido.

Pa fasilitá i pa informá nos konsumidónan mas mihó, Fundashon pa Konsumidó a pone tur e 142 produktonan di nos makutu di supermerkado den un tabèl ya asina kada konsumidó por tin un bista mas amplio na kua supermerkado ta mas kumbiniente p’é hasi su kompranan. Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefòn: 462-6666 òf via e-mail: info@fundashonpakonsumido.org. Pa wak e tabelnan, klik aki. 

Komparashon di preis di fruta i berdura (Mei 2013)

Fundashon pa Konsumidó, kontinuando ku su komparashonnan di preis, a realisá den luna di mei anotashon preis di fruta i berdura ku mas ta wòrdu bendí den nos supermerkadonan. A kohe preis di diferente berdura  manera batata, batata dushi, yuka, tomati, promentòn, siboyo, shampiòn, blumkol, bonchi bèrdè i largu, awakati, wòrtel, prei, spinazi i tambe sla. Tambe a kohe preis di algun fruta, entre otro anasa, kiwi, bakoba, lamunchi, mandarein, pera, pluim, apel, apelsina, melon, papaya, patia i drùif. E diferente produktonan a wòrdu anotá segun preis pa kilo i preis di unidat, totalisando asina un kantidat di 77 produkto.

Mangusá Rio, esun mihó surti

A base di e komparashonnan di preis Mangusá Rio ta resultá un di e supermerkadonan mihó surti ku 42 di e 77 produktonan na benta. Na di 2 lugá a resultá Esperamos ku 40 produkto di nos makutu di fruta i berdura, sigui pa Mangusá Hypermarket ku 39 produkto for di e makutu di 77 produkto.

Centrum Piscadera

Pa loke ta kantidat di produkto na mihó preis, Centrum Piscadera ta skor mihó ku mas tantu di produkto na un mihó preis, sigui pa Goisco Wholesale Club. Analisando mas aleu nos ta nota ku Centrum Piscadera a skor mihó pa loke ta departamentu di berdura siendo ku Goisco Wholesale Club a skor ku mas tantu produkto na un mihó preis den e departamentu di fruta. Mirando ku niun supermerkado ta skor echt komo esun mas ekonómiko, nos rekomendashon ta pa tur konsumidó konsultá e tabèlnan ya asina semper bo ta kumpra dirigí, bo ta kumpra loke bo ta gusta, loke ta skapabo sigur tempu i sèn..!

Preisnan variabel

Den preisnan di fruta i berdura, Fundashon pa Konsumidó a konstatá ku tin diferensha di preis notabel entre supermerkadonan, speshalmente pa loke ta preis di berdura. Páprika (promentòn) kòrá ta varia for di fl. 7,60 pa kilo (Centrum Mahaai/ Piscadera) te ku fl.14,00 (California Supermarket). Páprika (promentòn) hel ta varia for di fl.8,59 pa kilo (Centrum Piscadera) te ku fl.16,95 (Goisco). Preis di siboyo kòrá pa kilo ta varia for di fl. 2,67 (Centrum Mahaai) te ku un fl. 8,99 (Van den Tweel). Bloemkool pa kilo ta varia for di fl. 4,34 (Centrum Piscadera) te ku fl. 12,00 (Exito). Awakati tambe su preis ta diferenshá bastante.. For di fl. 5,47 (Vreugdenhil) te ku fl. 9,95 (Alves).

Interesante pa sa

Fundashon pa Konsumidó analisando e preisnan di supermerkadonan di mesun kadena a nota ku di e 38 produktonan ku Mangusá Rio i Mangusá Hypermarket tin komun, 32 di nan e preis ta igual den ámbos supermerkado. Di otro banda di e 24 produktonan ku Centrum Mahaai i Centrum Piscadera tin komun, ta solamente 9 produkto tabatin mesun preis den ámbos filial. Preis di un kilo di Apel marka Red Delicious ta mustra basta igual den nos supermerkadonan lokal. Apelsina venezolano ta muchu mas barata ku apelsina merikano. Masha poko supermerkado tabatin pera na momentu di nos komparashon di preis.

Kumpra sabí, konsulta bo tabèl

Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di produktonan di nos makutu di fruta i berdura den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na telefon: 462-6666 òf via e-mail: info@fundashonpakonsumido.org.  Por wak e tabèlnan klek aki.

Komparashon di preis di karni (Mei 2013)

Resientemente Fundashon pa Konsumidó a hasi un komparashon di preis den supermerkadonan riba nos isla a base di un selekshon di produkto preselektá den e sekshon di karni i belèg. E anotashon di preis a tuma lugá di 21 pa 31 mei 2013. A kompará preis di un kantidat di 38 produkto manera bifstùk, steak, pòrchòp, galiña, karn’i baka, karn’i kabritu, karn’i sòpi i mondongo. Tambe a kompará preis di algun belèg manera schouderham, turkeyham, keshi, wòrs dushi i wòrs salu. A base di su kapasidat Fundashon pa Konsumidó ta kompará produktonan manera karni, fruta i berdura solamente riba preis pa peso i no por tene kuenta ku diferensia di kalidat di e produktonan. Pa e motibu aki Fundashon pa Konsumidó ta hasi un apelashon na tur konsumidó pa wak bon kiko e ta kumpra. Kontrolá pa bo mes e estado i kolo di e produkto, hole e produkto si ta posibel i nesesario i chèk tambe e fecha di empake di e produkto. Semper kontrolá promé bo kumpra.

 

Esperamos i Mangusá Rio mihó surti

A base di e selekshon di produktonan den e komparashon di preis, Esperamos Supermarket i Mangusá Rio ta resultá e supermerkadonan mihó surti.  Esperamos Supermarket i Mangusá Rio tabatin 36 di e 38 produktonan di e selekshon den nan surtido. Na di 2 lugá a resultá Mangusá Hypermarket ku 35 produkto di nos selekshon di karni. Pa loke ta kantidat di produkto na mihó preis, Centrum Mahaai a resultá e supermerkado ku mas tantu produkto na un mihó preis. Espesífikamente den e parti di belèg, Centrum Mahaai a skor mihó ku e otro supermerkadonan. Di otro banda nos remarká ku preisnan ta varia di dia pa dia i  ta na abo konsumidó pa ta konsiente i kritiko i kompará preisnan di e diferente supermerkadonan kada biaha ku bo hasi bo kompranan pa asina saka mihó probecho.

Preisnan variabel

Fundashon pa Konsumidó den su análisis a konstatá ku preisnan di produktonan di karni ta varia hopi den e diferente supermerkadonan. Algun ehèmpel: preis pa kilo di flank-, kogelbeef- òf sirloinsteak ta varia den e diferente supermerkadonan for di fl. 14,95 te ku un fl. 29,99 pa kilo. Pòrchòp i pòrchòp sin wesu ta keda bendí entre fl. 4,87 te ku un fl. 23,99 pa kilo. Preis di 1 kilo di chickenbreast ta varia entre fl. 8,50 i fl. 14,99. I preis di keshi “jonge kaas” pa kilo ta varia entre fl. 15,95 pa fl. 21,95.

Akinan nos ke remarká sí ku produktonan di karni, ta ser importá for di diferente merkado i pais. E echo aki por tin influensha riba e kalidat i preis di e diferente sortonan di karni. Ta importante pa kada ken tene kuenta ku esaki ora ta hasi kumpra. Ideal lo tabata si supermerkadonan kuminsá pone riba nan produktonan banda di preis, peso tambe e pais di orígen di e produktonan ya asina nos por tene kuenta ku e faktor aki tambe na momentu di kumpra.

Konsultá bo tabèl

Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di produktonan di nos makutu di karni den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Pa wak e tabelnan online, klik aki.

Komparashon di preis di kosmétika (Apr/mei 2013)

Fundashon pa Konsumidó den luna di aprel un biaha mas a hasi un komparashon di preis den botika- i supermerkadonan riba nos isla a base di un makutu preselektá di produktonan kosmétiko. E anotashon di preis a tuma lugá di 17 pa 29 aprel 2013. A kompará preis di un kantidat di 73 produkto den tur botika- i supermerkadonan riba nos isla.

BOTIKA NOVO, E BOTIKA, KU MAS PRODUKTO NA UN MIHÓ PREIS

Basá riba e komparashon di preis entre botikanan, Botika Novo a resultá e botika ku na momentu di e anotashon di preis, tabatin 22 produkto na un preis mas barata. Huntu ku Botika Novo, botika Groot Piscadera i botika Cerito ta e otro 2 botikanan ku a skor mihó den kantidat di produkto na un preis mas ekonómiko. Último añanan nos por bisa libremente ku e tres establesimentunan aki ta esnan ku ta skor mihó pa loke ta nos makutu preselektá di botika. Botika Groot Piscadera tabatin 20 produkto di nos selekshon na un mihó preis, miéntras ku Botika Cerito tabatin 15 produkto na un mihó preis.

BOTIKA MIHÓ SURTÍ

Pa loke ta trata surtido, Botika Novo a skor komo e botika mihó surti ku 63 di e 73 produktonan di nos selekshon di produkto, sigui pa botika Groot Piscadera ku 62 produkto i Botika Zuikertuintje ku 61 produkto.

MANGUSA HYPERMARKET, E SUPERMERKADO KU MAS PRODUKTO MAS BARATA

Basá riba e resultado di e komparashon di preis den supermerkadonan, Mangusá Hypermarket a resultá e supermerkado ku na momentu di anotashon di preis, tabatin 19 produkto di nos selekshon na un preis mas barata. Huntu ku Mangusá Hypermarket, Mangusá Rio i California Supermarket ta e otro 2 supermerkadonan ku a skor mihó den kantidat di produkto na un preis mas ekonómiko. Mangusá Rio tabatin 16 produkto di na mihó preis, miéntras ku California Supermarket tabatin 10 produkto na mihó preis.

VARIASHON DI PRODUKTO

Pa loke ta trata surtido, Mangusá Hypermarket a skor komo e  supermerkado mihó surtí ku 69 di e 73 produktonan di nos makutu preselektá, sigui pa Alves Supermarket ku 65 produkto i Centrum Mahaai supermarket ku 64 produkto.

DIFERENSHA DI PREIS ENTRE BOTIKA I SUPERMERKADO

Fundashon pa Konsumidó a konstatá ku por lo general e preisnan di e produktonan preselektá na supermerkadonan ta mas ekonómiko ku na botikanan.

Den e komparashon a sali na kla ku den 41 kaso un supermerkado tabatin e preis di mas barata i un botika e preis di mas karu. Na 22 okashon un botika ta bende un produkto na un preis mas ekonómiko i un otro botika tin e na un preis mas karu. Pa ku 10 produkto un supermerkado tabatin, i e preis mas karu, i esun mas barata. I solamente den kaso di Zambesi Oil Gro un botika ta bende e produkto aki na un preis mas ekonómiko miéntras ku un supermerkado tin e preis di mas karu.

Pa duna mihó informashon na nos konsumidónan Fundashon pa Konsumidó konstantemente ta evaluá su lista pa asina yega na unu ku tin e produktonan mas bendí, mas usá i mas kumprá dor di nos konsumidónan.

Fundashon pa Konsumidó ke aksentuá un biaha mas ku e análisis di e komparashon di preis aki ta basá riba un selekshon limitá di produkto. Nos ke enfatisá ku pa por bisa kua establesimentu ta esun mas barata nos mester por kompará preis di tur produkto ku botika- i supermerkadonan tin en komun. E ora ei nos por tin un mihó bista riba ku establesementu ta esun di mas barata. Loke si nos por bisa ta kua ta e botika òf supermerkado ku mas tantu produkto na un preis mas ekonómiko i kua ta mihó surtí.

Pa tur konsumidó ku ke haña un bista di e diferente preisnan den e diferente botika- i supermerkadonan, Fundashon pa Konsumidó a pone tur e produktonan den un tabèl pa asina e konsumidó mes por haña un bista mas amplio i kla di e botika i supermerkado kaminda e produkto ta mas barata i unda tin e produkto mas karu. Tur interesado ku kier haña un kopia di e tabèlnan aki por pidi esaki via nos email: info@fundashonpakonsumido.org, telefon: 462-6666 òf via nos wèpsait www.fundashonpakonsumido.org .

Pa wak e tabelnan online, klik aki.

P.S. Pa esnan ku ke wak e tabel di Botika so, klik aki i pa e tabel di kosmetika den supermerkado so, klik aki.

Komparashon di preis Supermerkado febrüari 2013

Pa download klik aki.

Komparashon di Material di konstrukshon dec. 2012

Na fin di novèmber Fundashon pa Konsumidó a hasi un komparashon di preis di material di konstrukshon ku ta wòrdu bendí riba nos merkado. Pa esaki nos a bishitá 8 hartwèrnan ku ta bende material pa konstrukshon na Kòrsou.

Fundashon pa Konsumidó a inventarisá preisnan di e material pa konstruí un kas di fundeshi te na dak. A kompará produktonan manera betonmat, betonijzer, kokerprofiel, hoekijzer, groove pine, palu, porta, kozijn, pvc buizen, pvc stukken, pipa di koper, eterniet, dakpannen, zinkplaten, plafond platen, multiplex, betonplex, pego, joint compount, boormachine,zaagmachine, cut off sew machine i ferf.Kolaboradónan di Fundashon pa Konsumidó a bishitá i kompará preis na e siguiente hartwèrnan: Kooyman, Gomez Entrerprises, Marchena Hardware, Fereteria Skèrpènè, Dijtham, Building Depot, Wema i Staal Antillen Heru NV.

Mirando ku kada un di e diferente empresanan ku nos a bishitá a skor bon den un òf mas kategoria di e komparashon di preis aki, ta konsehabel pa studia e posibilidat di kumpra bo materialnan na diferente hartwèr. Material di konstrukshon ta un invershon grandi, pues si bo por haña esaki na un mihó preis, probechá.

Analisando e komparashon di preis nos por konkluí ku tin hartwèr ku ta skor mihó ku otro den sierto kategoria. Algun konklushon for di e análisis:

  • Pa palu, bo mester ta na Fereteria Skèrpènè;
  • Betonmat i betonijzer, ta kumbiní bo kumpra na Staal Antillen;
  • Pa pipa di PVC shinishi, wak promé na Building Depot;
  • Multiplex ta mas barata na Building Depot;
  • Pa fèrf Comotex, Comolux i VD Draden pasa promé na Fereteria Skèrpènè;
  • Den e sekshon di eternit Kooyman ta resaltá ku su preisnan;
  • Pa kokerprofiel ta Gomex Enterprises bo mester ta.

Pa fasilidat Fundashon pa Konsumidó a pone tur e diferente material di konstrukshon den un tabèl, di moda ku kada konsumidó por haña un bista mas amplio di e surtido i preis ku e diferente establesimentunan ta ofresé. Por pidi e tabèl via email: info@fundashonpakonsumido.org òf tuma kontakto ku nos ofisina.

Pa download klik aki

Kumpra konsiente i evitá problema

Komo konsumidó sòru semper pa delantá bo sa kiko bo ta buskando. Promé ku kumpra bo mester kompará preis, kalidat, garantia, i servisio. Bou di servisio adishonal ta kai por ehèmpel servisio di entrega grátis na kas i otro servisionan ku hartwèrnan ta ofresé bo na momento di kompra.

Paga tinu ora di firma pa risibí un produkto, pasombra tin ora bo ta firma tambe pa e kondishon di e produkto, o sea si e ta den bon estado. Dor ku bo no por a kontrolá esaki pone riba e papel, ku bo ta firma solamente pa risibí e produkto. Eksigí pa tur palabrashon ta riba papel, preferiblemente riba bo bòn. No paga bo artikulo sin tin e  informashon ku e ta den stok.

 

Atentamente,

Fundashon pa Konsumidó

KOMPARASHON DI PREIS DI PASKU 2012

Alves Supermarket i Centrum Mahaai, esnan mihó surti.

Manera ya ta un kustumber, den temporada di desèmber Fundashon pa Konsumidó ta hasi un komparashon di preis di e produktonan ku mas e konsumidó ta usa den temporada di Pasku i fin di aña. Basá riba e análisis di e preisnan, Fundashon ta publiká e resultado di e investigashon aki den forma di un tabèl pa asina tur konsumidó tin un mihó bista unda pa hasi su kompranan na un manera mas ekonómiko, segun kada ken su eskoho propio.

E aña aki e komparashon di preis a tuma lugá di 12 pa 17 di desèmber.  A kompará preis di un kantidat di 128 produkto repartí den 24 kategoria di produkto. E kategorianan di produktonan ta: delisianan di Pasku, speserei (klabu hinté), pikalili, alkapara, aseituna ku pipita, siboyo chikí den binager i  garbanso. Mas aleu a kompará tambe preis di bebida stèrki manera biña, ròm, ponche krema, shèri, wiski i serbes. Tambe limonada,  tònik, anasa den bleki, puiru di koló (foodcolouring), hariña di pan, fruta seku,  buskuchi dushi (di Pasku) den bleki, mayonès, snek, chukulati i pasta. Pa e komparashon di preis a Fundashon pa Konsumidó a haña koperashon di tur supermerkado.

Nos ke aksentuá un biaha mas ku den e komparashon di preis aki no a tene kuenta ku kalidat di e produktonan, speshalmente si nos ta papia di delisianan  manera pan di Pasku, ayaka, pékele,  salmou i sùlt. Den tipo di produktonan asin’aki kada supermerkado tin na mes forma di prepará esakinan, ku sigur ta trese diferensha den preisnan. Pues tene kuenta ku esaki na momentu ku bo ta kumpra.

ALVES i CENTRUM MAHAAI, E SUPERMERKADONAN MIHÓ SURTI PA PASKU

For di nos makutu di Pasku a sali na kla ku pa loke ta trata e surtido, Alves Supermarket i Centrum Supermarket na Mahaai  ta esnan mihó surti pa e konsumidó ku ta preparando su kompranan di Pasku i fin di aña. Ámbos tabatin 106 produkto di e 128 produktonan kompará.

Pa loke ta e supermerkado ku a resultá mas ekonómiko, aki nos mester indiká ku no tabatin un supermerkado ku realmente a  sobresalí. Mirando esaki nos ke hasi un apelashon na nos konsumidónan pa konsulta e tabèl, traha bo mes makutu di kompra i kompará unda ta mas kumbiniente pa hasi nan kompranan.

Pa download e tabel di preis di presi klik aki.

Di parti di direktiva i personal di Fundashon pa Konsumidó nos kier deseá  pueblo di Kòrsou felis dianan di fiesta, yená ku pas i amor i alegria.

Na nòmber di Fundashon pa Konsumidó

Marc Marshall

Direktor

KOMPARASHON DI PREIS DI MATERIAL DI KONSTRUKSHON

 

kontratistaDurante di e periodo di 4 di novèmber pa 11 di novèmber 2016, Fundashon pa Konsumidó a bishitá 7 diferente hartwer ku ta bende material pa konstrukshon na Kòrsou i a anotá i kompará preisnan den e sektor aki.

 

Ku e komparashon di preis di material di konstrukshon aki Fundashon pa Konsumidó ke asistí konsumidónan den nan kompra di material pa konstrukshon spesialmente durante di e dianan di fiesta benidero.

 

Fundashon pa Konsumidó a bishitá e siguiente hartwernan: Kooyman, Gomez Entrerprises, Marchena Hardware, Ferreteria Skèrpènè, Dijtham, Building Depot i Staal Antillen. Na e hartwernan aki a inventarisá preis di 183 tipo di produkto i material pa konstrukshon. A kompará produktonan manera betònmat, betòneizer, kokerprofil, hukeizer, gruf pain, palu, porta, kozein, pipa di pvc, pvc ‘stukken’, pipa di koper, eternit, panchi di dak, plachi di zenk, plachi’ plafòn, multiplèks, betònplèks, pego, jòint kòmpount i fèrf.

 

Sea alerta i kumpra konsiente

Analisando e komparashon di preis nos por konkluí ku no ta tur material di konstrukshon ta optenibel na tur hartwer. Tambe nos por konkluí ku tin hartwer ku ta skor mihó ku otro den sierto kategoria. Aki nos ta duna algun ehèmpel.

 

Segun e lista di anotashon di preis, si ta PVC buis òf palu di skaf bèrdè bo mester, Building Depot ta e hartwer ku tin mas di e produktonan aki na un mihó preis. Si bo ta buskando betònmat òf betònijzer, nos ta konsehá pa hasi Staal Antillen un bishita.

 

Tambe nos a nota ku tin vários produkto ku a subi òf baha di preis durante aña. Por ehèmpel kosein ‘hardhoud’ na Kooyman a kosta aña pasá fl.139.99. E aña aki, na momentu ku Fundashon pa Konsumidó a anotá preis, esaki ta kosta fl.249.99, kual ta un subida di fl.110.00. Na Gomez Enterprises, kosein ‘pitch pine’ tabata kosta aña pasá fl.127.15. E aña aki e ta kosta fl. 90.10, kual ta un bahada di fl. 37.05.

 

Fundashon pa Konsumidó ke pone énfasis i alabes remarká ku artíkulonan di konstrukshon ta keda importá for di diferente merkado i pais. E echo aki por tin influensia riba kalidat i preis di e diferente artíkulonan. Ta importante pa nos konsumidónan tene esaki bon na kuenta.

 

 

 

 

 

Lista di anotashon di preis

Pa fasilidat Fundashon pa Konsumidó a pone e diferente materialnan di konstrukshon den un tabèl, di moda ku kada konsumidó por haña un bista mas amplio di e surtido i preis ku e diferente establesimentunan ta ofresé. Por pidi e lista di anotashon di preis aki tambe via meil: info@fundashonpakonsumido.org òf tuma kontakto ku nos via telefòn 462-6666.

Color Skin

Header Style

Nav Mode

Layout

Wide
Boxed