Investigashon di Merkado

Introdukshon

Investigashon ta un parti importante di nos trabounan. Un di nos metanan ta pa informá komunidat ku informashon konkreto i veras, basá riba echos. E investigashonnan ku mas ta resaltá ta nos investigashon tokante komparashon di preis di produkto i servisio.

Banda di e komparashonnan di preis kustumbrá, (karnaval, Pasku, risibimentu, kuaresma, komparashon di preis di botika, di baby, di komestibel) nos ta bai hasi investigashon den otro sektornan. Algun dje  investigashon ku nos a  hasi den añanan anterior: investigashon di servisio di TDS, UTS ántes SETEL NV, nos transporte públiko i servisionan bankario. Den e ultimo aki nos a midi kon bon informá e konsumidó ta di servisionan ku bankonan ta duna ora di por ehèmpel hasi fiansa, hipotek, habri un kuenta na banko.

Tambe nos a hasi un investigashon pa yega na un maneho di energia responsabel, kua konklushon i rapòrt nos a entrega na gobièrnu tambe. I asina tambe tin investigashonnan mas chikí ku nos ta publiká den nos revistanan.

Pasa den nos investigashonnan i informá bo mes!

Kon bo ta eksperiensha bo banko?

Introdukshon

Na mart 2010 Fundashon pa Konsumidó a duna enkargo na e büró Curconsult pa hasi un enkuesta seka nos konsumidónan tokante konosementu, eksperiensha i persepshon di e konsumidó tokante su banko titulá “: Over Banken”. Pa kompletá e investigashon, Fundashon pa Konsumidó a laga hasi un Mystery Shopping pa por a kompará resultadonan di e enkuesta ku práktika di bida real.

Enkuesta “Over Banken”

E último tempu Fundashon pa Konsumidó a wordu aserká ku preguntanan tokante di e komishon- i interesnan haltu  ku bankonan ta kobra riba un fiansa. Pa Fundashon pa Konsumidó motibu pa nos pa hasi un estudio riba e persepshon i eksperiensha di e kliente ku su banko. Un total di 800 persona a wordu entrevistá ku preguntanan tokante nan kuenta koriente i di spar, motibunan pa spar o fia i nan konosementu di e gastunan relashoná ku un kuenta bankario.

Resultadonan

Di tur e entrevistadonan kuater di sinku persona tin un kuenta di banko. Di e personanan ku kuenta di spar dos di kada sinku persona ta spar regularmente dor di pasa sèn pa luna riba nan kuenta di spar. Mitar di e kuestionadonan sa kuantu interes e ta hanja riba su kuenta di spar.

E pregunta kua ta e motibunan pa hasi fiansa a wordu relashoná ku un meta di e fiansa. Akinan nos ta mira ku e konsumidó ta ménos inkliná pa hasi un fiansa pa gastunan di konsumo. E motibu i meta pa fia ta mas pa invershonnan duradero manera un kas o outo (tabèl 1)

Motibu pa hasi fiansa
  % si   % no
Kumpra kas   81,20%   18,80%
Kumpra outo   68,10%   31,90%
Estudio di yunan   62,60%   37,40%
Drecha dak di kas   58,80%   41,20%
Frigidaire   38,10%   61,90%
Vakantie   24,00%   76,00%
Flat screen tv   13,00%   87,00%
Sen pa pasa luna kune   11,00%   89,00%

 

E kontestanan riba preguntanan tokante konosementu di kondishonnan di hasi fiansa tabata mas diverso. 55% di e kuestionadonan ta informá su mes tokante e kondishonnan di fiansa na momentu di hasi un fiansa konvenshonal. Mayoria ta hanja e suma ku mester paga pa luna mas importante. Kosnan manera APR (interes anual), límite di krédito i porsentahe di interes riba credit card i límite di krédito ta ménos konosí.

Di otro banda e 35% di e kuestionadonan ku tin fiansa ta bisa di ta bon na altura di e kondishonnan di fiansa i di porsentahenan di interes. Tambe nan eksperiensha ta di ta wordu bon Informá dor di banko. Remarkabel ta si ku 50% di e kuestionadonan lo no hasi un fiansa serka e mesun banko un próksimo biaha.

Por lo general e kliente ta satisfecho riba su banko:  e ta eksperenshá i kualifiká e trato, servisio i e manera di maneho di nan sèn  komo bon. Komentarionan krítiko ta mas den e esfera di tempu ku mester warda den rei i tokante desaprobashon di fiansa.

Mystery Shopping

Pa kompará e resultadonan di e enkuesta Fundashon pa Konsumidó a laga hasi un seri di bishita na bankonan lokal.  E intenshon di e “Mystery Shopping” tabata pa kontrolá si di bèrdat e informashon i splikashon duná dor di banko tokante un fiansa ta korekto i transparente manera e konsumidó ta eksperensiá. Ya ku ta difisil pa bo por duna un kualifikashon si bo no sa tur loke mester wordu bisa na abo.

E servisio di mayoria di e bankonan por wordu kualifiká komo bon: no mester a warda hopi pa yega na bùrt, empleadonan tabata amabel, korekto, interesá i a tuma sufisiente tempu pa kontesta preguntanan di nos mystery-shoppers. Kasi tur banko a pensa riba privasidat di e kliente pa hasi un kombersashon konfidensial.

E informashon duná si a varia hopi di banko pa banko. Hopi banko ta duna informashon oral tokante e fiansa, e kondishonnan, e durashon i e pago mensual. E kalkulo di e fiansa máksimo ta diferenshá hopi entre e bankonan. Unu ta konta hür den gastunan mensual, otro ta laga e fiansa dependé tambe di e añanan ku e kliente tin ta traha. Por lo general e mystery shopper por a fia un tersera parti di su salario.

E empleado di banko kasi na tur okashon a menshoná e interes riba e fiansa. Den niun okashon esaki tabata igual na e APK (Anual Percentage Rate). Na momentu ku a puntra tokante esaki a sali na kla ku hopi di e empleadonan no ta konosé o no sa eksakto kiko e terminologia aki ta nifiká. Preguntanan tokante klóusulanan di but i pago avansá ta wordu bon kontestá. Sinembargo na niun di e kòmbersashonnan informashon a wordu duna tokante kostonan adishonal pa ku e fiansa manera komishon di fiansa, seguro o kubrimentu di rísiko, O.B. ku mester wordu pagá, eventual kosto di seyo.  Den práktika e gastunan aki ta relativamente haltu i si nan wordu inkluí den e APR nos ta yega na un porsentahe di interes efektivo mas haltu esun ku banko ta usa. Si tur e gastunan adishonal wordu inkluí den e APR e interes riba un fiansa personal lo ta entre 16% pa 30%. Pa un fiansa di outo e APR lo varia entre 7,5% i 11% ku un tòp di 16% segun nos investigadornan.

Niun di e empleadonan di banko a duna informashon por eskrito tokante en fiansa o su kondishonnan.  Foyetonan ku informashon, ku mayoria biaha ta eksistí, tampoko ta wordu duna na e kliente.
Na niun banko ta posibel pa lesa e kontrato di fiansa adelantá ni tampoko hanja un konsepto di e kontrakt pa bai kas i lesa trankil. Loke ta buta ku e kliente ta wordu fòrsá pa firma sin hanja oportunidat sufisiente di lesa tur e kondishonnan i sigur e “letranan chikí”.

Pa un vershon kompletu di e estudio i investigashon,  por tuma kontakto ku Fundashon Pa Konsumidó.

Deseo i nesesidatnan di e usario potensial di transporte públiko

Introdukshon

Na aña 2006 Fundashon pa Konsumidó a laga hasi un investigashon ku e meta pa haña sufisiente informashon verídiko riba deseo i nesesidatnan di usarionan (postensial) di transporte públiko, ku e meta pa suministrá gobièrnu ku konsehonan pa trese kambionan i mehorashonnan nesesario den e sistema di transporte públiko aki na Kòrsou.

E pregunta kardinal den e investigashon aki tabata: Kua ta e deseo i nesesidatnan di e usario (potensial) di transporte públiko na Kòrsou en relashon ku aksesibilidad, seguridad, kalidad di e orario di rutanan, suministro di informashon, kalidad di e medio di transporte, tarífanan i kòntròl?

Pa mas informashon tokante e investigashon aki, por download e dokumentonan riba e página aki.

Inhustisia of Iregularidat

Color Skin

Header Style

Nav Mode

Layout

Wide
Boxed