Anotashon di preis ‘Back to School’ 2017

Faltando algun siman pa fakansi grandi finalisá, Fundashon pa Konsumidó ke enfoká riba e importansia di kumpra artíkulonan di skol na un manera konsiente i sabí. Fundashon pa Konsumidó konhuntamente ku Ministerio di Desaroyo Ekonómiko (MEO), a hasi anotashon di preis na diferente establesimentu, basá riba artíkulonan pa skol na un preis kumbiniente. E meta primordial di e anotashon di preis aki ta pa informá i fasilitá e kompra di kada mayor.

Den e periodo di 24 pa 31 di yüli 2017, a hasi bishita na un total di 20 establesimentu i a anotá preis di 60 diferente materialnan pa skol. E establesimentunan ku a forma parti di e anotashon di preis aki ta:

Office Stop, La Curaçao Zeelandia, Curaçao Office Supply, Mensing Caminada, Multi Centrum 2000, Señor Barata, Super Barata, Bruna, Office System, Casa Cesar, Building Depot, Home Plus st. Maria i Zeelandia, Samsom Chobolobo, Jan Noorduynweg i Colon, Samsom Digital Plus, Martis Agencies i Punda Department Store.

Ta bon pa enfatisá ku preisnan di artíkulonan pa skol no ta kai bou di un preis máksimo stipulá pa gobièrnu di Kòrsou. Ku esaki nos ke bisa ku kada negoshante ta liber pa pone su mes preis. Netamente esaki ta e motibu ku a skohe pa anotá solamente e preisnan di mas barata na kada establesimentu. Den e anotashon di preis aki no a hasi komparashon di e kalidat di e artíkulonan pre selektá.

Mihó surtí

For di nos anotashon di preis, Samsom Chobolobo a resultá e establesimentu mihó surtí ku 55 artíkulo for di e 60 artíkulonan ku nos a anotá. Na di dos lugá ku un kantidat di 53 artíkulo, Samsom Jan Noorduynweg i Colon. Por último, na di 3 lugá nos ta haña Digital Plus ku un total di 52 artíkulo pa skol.

Preisnan variá

Fundashon pa Konsumidó a tuma nota di un variedat basta grandi di markanan di artíkulonan pa skol disponibel na e diferente establesimentunan. Tur e variashon di markanan aki ta brinda e posibilidat pa konsumidónan por hasi nan eskoho konsientemente. Un tas pa skol por ehèmpel, riba e merkado aktual por kosta entre fl. 9.99 te ku fl. 76.95.  Un otro ehèmpel calculator. Esaki por kosta entre fl. 24.00 te ku fl.49.99.

Fundashon pa Konsumidó ta brinda mayornan i tur sobra konsumidónan un lista ku tur e establesimentunan, e artíkulonan disponibel i nan respektivo preis. Esaki sigur ta hasi e proseso di búskeda di artíkulonan pa skol na un preis kumbiniente i muchu fásil pa tur mayor.

E lista di anotashon di preis aki ta aksesibel riba nos wèpsait www.fundashonpakonsumido.org. Tambe konsumidónan por pasa libremente na nos ofisina situá na De Ruyterkada 53, bèl nos na (5999) 462-6666 òf pidi un kopia via nos meil info@fundashonpakonsumido.org

Pa finalisá, Fundashon pa Konsumidó ke probechá di e oportunidat pa deseá nos muchanan un aña eskolar sumamente eksitoso. Un aña den kua disiplina i trabou duru mester ta e base fundamental pa alkansá e meta deseá .

FPK Back 2 School 2017 final

Color Skin

Header Style

Nav Mode

Layout

Wide
Boxed