Komparashon di preis di smartphones

Den kuadro di nos tarea pa informá, eduká i empoderá nos konsumidónan, Fundashon pa Konsumidó konstantemente ta fasilitá informashonnan relashoná ku preis i servisio aki na Kòrsou. Mirando e echo ku awendia mayoria di nos ta hasi uzo di un smartphone, den luna di aprel Fundashon pa Konsumidó a pasa i anotá un kantidat di 58 modèl di smartphones na 8 diferente establesimentu.  E establesimentunan aki ta: Omni, Boolchands, Multi Tronics, Fone Zone, Connection, La Curaçao i Phone House 1 i 2.  Markanan ku a keda anota ta Samsung, Apple, LG, Huawei, BLU i CAT.

Ku e komparashon di preis aki Fundashon pa Konsumidó ta fasilitá konsumidónan den nan proseso pa un kompra konsiente.

Boolchands ta mihó surtí

Di e 8 establesimentunan ku Fundashon pa Konsumidó a pasa i anotá preis, Boolchands ta resultá esun mihó surtí.  Nan tin un total di 23 modèl di e 58 modèlnan ku a keda pre selektá.  Connection ta tin un kantidat di 20 modèl di telefòn i Multi Tronics ta tin 19.

Mas ekonómiko

E establesimentu ku tin mas artíkulo na un preis mas ekonómiko ta Connection. Di e 23 modèlnan di telefòn pre selektá, nan tin un kantidat di 19 na un preis mas kumbiniente, kompará ku e otro establesimentunan.

Diferensia di preis

Durante di e anotashon di preis aki, Fundashon pa Konsumidó a konstatá un diferensia grandi di preis entre e diferente establesimentunan i produktonan. Por ehèmpel, un Samsung Galaxy S6 Edge di 32 GB ta kosta na Connection fl. 800,- i na Multi Tronics e mesun modèl aki ta kosta fl. 1050,-. Esaki ta un diferensia di fl. 250,-.

E diferensia di mas grandi ku a keda konstatá ta den e marka Apple. Un iPhone 7 plus di 256 GB ta kosta na Connection fl. 1950,- i na Boolchands esaki ta kosta fl. 2649,- kual ta un diferensia di preis di fl. 699,-.Algu remarkabel ku a sali for di e anotashon di preis aki ta e kantidat di GB i nan preis na e diferente establesimentunan. Por ehèmpel: un iPhone 6S di 32 GB ta kosta na Boolchands fl 1499,- siendo ku na Connection i Fone Zone, un iPhone 6S ku un kapasidat di 64 GB ta kosta mas barata ku un di 32 GB na Boolchands.

Ta sumamente importante pa bo hasi bo kompra na un manera konsiente i responsabel. Kompará preis di e produkto ku bo ke kumpra na diferente establesimentu promé ku bo kumpra esaki. Tambe ta konsehabel pa bo ekipá bo mes ku konosementu di e marka, modèl i tambe e posibilidatnan ku esaki ta brinda bo. Asina bo por evaluá kua telefòn ta kuadra mas ku bo nesesidat i personalidat.

Prijsvergelijking Smartphones

Color Skin

Header Style

Nav Mode

Layout

Wide
Boxed