Komparashon di preis di karni i bèrdura yüni 2017

Durante e periodo di 26 di mei te ku 1 di yüni 2017,  Fundashon pa Konsumidó a bishitá un kantidat di 22 establesimentu pa anotá preis di 79 produkto. Den nan tin diferente produkto di karni, belèg, fruta i berdura. E 22 establesimentunan aki ta: Supermarket 2000, Van den Tweel, Arco Iris, Arti’s Otrobanda, Best Buy, Bon Bini, Boulevard, Centrum Mahaai, Centrum Piscadera, Colon, Esperamos, Exito, Mangusa Rio, Mangusa Hypermarkt, Vreugdenhil, L-Z-F Mini Market, Feng FU/Bonam, Queens, Luna Park, Tropical/st.maria i Ruyterkade Supermarket. Meta di e anotashon di preis aki ta pa fasilitá e proseso di kompra di nos konsumidónan.

Ku e komparashon di preis aki Fundashon pa Konsumidó ta fasilitá konsumidónan den nan proseso pa un kompra konsiente. Ta bon pa menshoná ku durante di e komparashon di preis aki no a tene kuenta ku pais di orígen, marka ni kalidat di produkto.

Esperamos supermarket esun mihó surti

Ku un total di 67 produkto di e 79 produktonan ku Fundashon pa Konsumidó a anotá, Esperamos supermarket ta resultá esun mas mihó surtí. Mangusa Rio Canario i Hypermarket ta resultá na di dos lugá ku un kantidat di 66 produkto i Centrum Mahaai ku Centrum Piscadera ta resultá na di 3 lugá ku un kantidat di 64 un produkto.

Centrum Mahaai tin mas produkto di karni, bèrdura i belèg na mihó preis

Resultadonan di e komparashon di preis ta mustra ku Centrum Mahaai tin mas produkto di karni, bèrdura i belèg na un mihó preis. Di e 79 produkto ku Fundashon pa Konsumidó a anotá, Centrum Mahaai tin 18 produkto na un preis mas kumbiniente. E di dos lugá ta pertenesé na Centrum Piscadera, kual ta tin 17 produkto na un preis mas ekonómiko i na di tres lugá ta Mangusa Rio Canario ku un kantidat di 17 produkto tambe.

Diferensia grandi di preis 

Durante di e anotashon di preis aki, Fundashon pa Konsumidó a konstatá un diferensia grandi di preis entre algun sorto di produkto. Por ehèmpel, un kilo di ‘Schouderham’ na slais ta kosta na Centrum Mahaai i Piscadera fl. 9.62. Na Feng FU/Bonam supermarket esaki ta kosta fl. 25.00, kual ta un diferensia di fl. 15.38.  Un kilo di ‘Jonge kaas’ na slais ta kosta na Esperamos supermarket fl. 11.15 i na Luna Park e ta kosta fl. 23.95, kual ta un diferensia di preis di fl. 12.80. Pa loke ta trata karni, un kilo di Flanksteak ta kosta fl. 11.95 na Centrum Mahaai i Piscadera, siendo ku na Arti’s esaki ta kosta fl. 23.27. Esaki ta un diferensia di preis di fl.11.32. Ta bon pa menshoná ku e diferensia di preis por ta mará na diferente faktor. Por ehèmpel pais di orígen, kalidat di produkto, marka etc.

Subida di preis

Despues di e diferente kontrolnan di e tim multidisiplinario, Fundashon pa Konsumidó a risibí diferente remarke di Konsumidónan ku a tuma nota di subida di preis den supermerkadonan. Fundashon pa konsumidó a hasi uzo di e lista di preis aki (yüni 2017) pa kompará e preisnan di luna di mart 2017. Di e 79 produktonan pre- selektá ku nos a anotá i kompará, Vreugdenhil supermarket tin mas produkto ku a subi di preis. Un total di 19 produkto a subi di preis. Bon Bini supermarket ta resultá na di dos lugá ku un kantidat di 18 produkto ku a subi di preis. Mangusa Hypermarket, Centrum Piscadera i Arco Iris supermarket ta na di tres lugá, ku un kantidat di 13 produkto.

Fundashon pa Konsumidó ta konsehá nos Konsumidónan pa subi nos wepsait www.fundashonpakonsumido.org i tira un bista riba e tabèl di komparashon di preis di e luna aki i tambe e tabèl ku ta indiká e preisnan di mart 2017 i yüni 2017. Kòrda ku komo konsumidó, bo tin derechi di eskoho, pues ta krítiko i kumpra semper konsiente i responsabel.

Pa mas informashon tokante di komparashon di preis di produktonan di karni, bèrdura i belèg  tuma kontakto ku Fundashon pa Konsumidó na telefòn 462-6666 òf e-mail info@fundashonpakonsumido.org.

PV juni 2017 superm & minim
PV juni 2017 vs maart superm & minim. vlees, groenten en fruit

Color Skin

Header Style

Nav Mode

Layout

Wide
Boxed