Komparashon di preis produktonan di prome nesesidat

Siman pasá Fundashon pa Konsumidó a publiká un komparashon di preis di karni, fruta i berdura.

Ademas di produktonan di karni i fruta i berdura, Fundashon pa Konsumidó a anotá i kompará preisnan di un total di 114 produkto pre- selektá den kual algun di nan ta kai den e asina yamá makutu básiko. Esakinan ta produktonan ku Fundashon pa Konsumidó ta konsiderá produktonan di promé nesesidat.

Bon Bini Supermarket ku mas produkto na un mihó preis

A base di nos komparashon di preis ku a tuma lugá entre 10 pa 20 di mart 2017, nos por konkluí ku Bon Bini Supermarket ta e establesimentu mas barata pa loke ta trata nos selekshon di produktonan di promé nesesidat. Di e 114 produktonan ku nos a selektá, Bon Bini tabatin 30 produkto na un preis mas abou. Supermarket Best Buy ta keda na di dos lugá ku un kantidat di 22 produkto di e 114 nan i Mangusa Hypermarket i Rio Canario ta keda na di tres lugá ku un kantidat di 21 produkto.

Centrum Mahaai, e supermerkado mihó surtí.

Segun e resultadonan di nos komparashon di preis, Centrum Mahaai a sali e supermerkado mihó surtí pa loke ta trata e produktonan ku a keda pre- selektá. Centrum Mahaai tabatin 94 di e 114 produktonan básiko pre- selektá den rèki na momentu ku Fundashon pa Konsumidó a pasa pa anotá preis. Esperamos Supermarket ta okupá e dos lugá ku 93 produkto i e di tres lugá ta bai pa Arco Iris i Bon Bini supermarket ku un kantidat di 89 produkto di e 114 produktonan pre-selektá den rèki.

Diferensia konsiderabel den preisnan di sierto produkto

Por lo general Fundashon pa Konsumidó a tuma nota ku no tin masha diferensia den e preisnan di e produktonan básiko pre-selektá. Di e 114 produktonan aki tabatin algun ku si tabata eksepshon riba esaki i riba kua tabatin diferensia di preis konsiderabel.

Desinfektante marka Tempo di 3.79 liter ta kosta na Arco Iris supermarket fl. 6.80, mientras ku Bonam minimarket tin e mesun produkto aki na balor di fl. 13.00. Kual ta un diferensia di fl. 6.20. Un otro diferensia di preis konsiderabel ku nos por a mira ta riba hariña di pan marka Gold Medal di 10 lbs. Mientras ku na Esperamos supermarket e produkto aki ta na balor di fl. 11.99, na Centrum Mahaai esaki ta kosta fl. 16.82. Pues, un diferensia di preis di fl. 4.83. Por ultimo,  Fundashon pa Konsumidó a tuma nota di un diferensia di preis pa loke ta trata pasta di djente Dr. Tichenor’s. Esaki ta kosta na fl. 9.35 na Centrum Mahaai i Piscadera. Na Vreugdenhil e pasta di djente aki ta kosta fl. 14.56, kual ta un diferensia di preis di fl. 5.21.

E diferensianan di preis ariba menshoná tabata e diferensianan mas grandi ku Fundashon pa Konsumidó a tuma nota di dje den e produktonan pre-selektá. Tene na kuenta si ku Fundashon pa Konsumidó no ta kompará kalidat òf orígen di e produktonan den su komparashon di preis. Na momentu di hasi bo kompra, kòrda ku e dos faktornan aki por tin influensia riba di e preis ku bo ta paga.

Konsultá bo tabèl

Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di e produktonan pre- selektá aki den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Pa kualke pregunta semper por tuma kontakto ku Fundashon pa Konsumidó na number di telefòn 462-6666 òf manda nos un mail na info@fundashonpakonsumido.org. Tambe por bishita nos wèpsait www.fundashonpakonsumido.org pa un bista amplio di komparashonnan di preis.

PV pakket superm & minim. producten maart 2017 final

Color Skin

Header Style

Nav Mode

Layout

Wide
Boxed